Issittumi pilersaarut 2011-mi piviusunngussaaq
Naalagaaffeqatigiit Issittumi periusissatut pilersaarutip suliarinissaa aallartippat.
Nunanut allanut ministerip Lene Espersenip nunatsinneereerluni uteqqammersup nuannaarutigaa, Kalaallit Nunaat Savalimmiullu Issittumi periusissamik suliaqarnernissaanik isumaqataammata. Sumiiffimmi tassani Danmarkip, Savalimmiut Kalaallillu Nunaata siunissami anguniasassat suliarineqarnissaat erngerlutik aallartinneqassapput.
Lene Espersenip neriuutigaa upernaakkut 2011-mi periusissat saqqummiunneqarsinnaassasut.
– Anguniartariaqarparput Issittumi isumannaannerusumik angallattoqarnissaanut maleruagassaqarnissaq, nunanut allanut ministeri isumaqarpoq. Imaassinnaavoq umiarsuit marluk angalaqatigiittariaqartut, imminut ikioqatigiissinnaasut, sermitsiaq.AG-mut oqareersimavoq.
Kuupik Kleistip sumiiffinni uuttortarneqarsimanngitsuni angalanissaq inerteqqutaalersikkusuppaa. Aamma piumasariniarpaa, aqumiut Issittumi angalasut immikkut ilinniarsimasuunissaat.
Kisianni upalungaarsimaneq annertusarneqartariaqarpoq. Imaappoq, sakkutuut imarsiortut timmisartukkullu angalasut nakkutilliinerussallutik sumiiffimmilu tassaniinnerussallutik.