Issittormiut
Issittumi politikkerini Sara siulittaasuujunnaarpoq
IA-mi siulittaasoq Folketingimilu ilaasortaq Issittumi inatsisartuni ilaasortaanni siulittaasuujunnaarpoq
Issittumi Inatsisartuni ilaasortaasut siulittaasuat Inuit Ataqatigiinni siulittaasoq Folketingimilu ilaasortaq Sara Olsvig siulittaasuujunnaarpoq. Politikkerit Canadami Whitehorsemi septembarip qulingiluaannit aqqarngat tikillugu ataatsimeeqatigiipput.
- Nuannaarutigaara angusaqarsimanerput malugisinnaagakku. Issittumi Siunnersuisooqatigiit nunanut assigiinngitsunut siunnersuuteqarput, sulilluartarnerpullu ilisimaneqarluartuummat siunnersuutigineqartut akuerineqartarput. Siulittaasuuffigalugu misigisaq nuannersuuvoq, misigisat amerlaqaat. Siulittaasup tulliaareerlungami siulittaasunngorput, Sara Olsvig oqarpoq.
Puisi pillugu suleqatigiinneq
Issittumi nunat pisuussutiminnik piniartarnerat annertunerusumik paasititsiniaaffigineqassasoq ataatsimiinnermi isumaqatigiissutigineqarpoq.
- Puisip amianik tuniseqqusiunnaarneq Canadamut Kalaallit Nunaannullu kisimi eqquinngilaq. Issittormioqatigiit tamarmik uani eqqorneqarput, tamannalu ataatsimut sullisigineqassaaq. Pisuussutivut inuussutigisinnaasariaqarpavut tunisinnaasariaqarlugillu, aamma inuussutissarsiornikkut nammineerluta ineriartortitsisinnaasariaqarpugut, Sara Olsvig oqalugiarnermini oqarpoq.
Sara Olsvig Folketingi sinnerlugu Issittormiut Siunnersuisooqatigiivinut ilaasortaavoq 2011-mili. Johan Lund Olsen Olsvig sinnerlugu Folketingimi ilaasortaalissaaq. Siunnersuisooqatigiit tulliani Ruslandimi 2016-mi ataatsimeeqatigeeqqissapput.
Eirik Sivertsen Norgemeersoq, Arbeiderpartiet, Sara Olsvig paarlallugu siulittaasunngorpoq.
Assit marluk ataani takukkit