Issittumi Sakkutooqarfik: Nunagisami naalagaanermik atortitsineq sikuiaanermit salliutinneqarpoq
Umiarsuup alapernaarsuutip Tritonip sumiiffinni allani sikuiaasinnaaguni, Saattuni nunaqarfiup eqqaani sikumik aserorterinnginnera tupigusuutigaat. Issittumi Sakkutooqarfik nassuiaavoq.
Issittumi Sakkutooqarfiup Avannaata Kommunia qanittukkut attaveqaqatigaa, taakku sikumik aserorterisoqarnissaanik pisariaqartitsillutik qinnuiginnipput.
- Sikumik aserorterisoqassagaangat kommuni Isittumi Sakkutooqarfimmut noqqaassuteqartussaavoq. Umiarsuit alapernaarsuutivut sumiiffimmiitillugit taamaaliorsinnaavugut. Umiarsuit qanittumiinngikkaangata sikumik aserorterineq ajorpugut, Issittumi Sakkutooqarfimmi attaveqaqatigiinnermik suliaqartoq, Camilla Broholm, Sermitsiaq.AG-mut oqaluttuarpoq.
Innuttaasut tupigusuttut
Issittumi Sakkutooqarfik qanittukkut nunaqarfiup Saattut eqqaani sikumik aserorterisoqarnissaanik qinnuigineqarpoq. Kisianni umiarsuup alapernaarsuutip Tritonip nunaqarfiup eqqaani sikumik aserorterinnginnera eqqumiigaat. Umiarsuarmik allamik orsussamik usisumik aserorterisinnaasumik tassaniittoqarsimasoq, Camilla Broholm nassuiaavoq.
- Umiarsuaq allakkoorluni sikunik aserorterinermit Tritonimit ikiorneqarluni pulavoq. Soorlu Uummannamit Saattunut aqqutissaliortoq. Umiarsuaq orsussamik usisoq angalasinnaavoq, peqatigisaanillu Saattunut sikumik aserorterilluni tikilluni, taanna oqaluttuarpoq.
Taamaammat Saattuni innuttaasut Triton takusinnaasimanngilaat.
Umiarsuit sumiiffinni piareersimaffiusuniittut
Issittumi Sakkutooqarfik sikumik aserorterivoq, umiarsuit nunaqarfinnut pilersuisussat tikissinnaaniassammata.
- Triton sikumik aserorterisinnaavoq. Kisianni assersuutigalugu Triton Sisimiut eqqaaniippat, taava Upernavimmut sikumik aserorteriartorluta angalanavianngilagut. Allanik suliassaqarpugut, pingaarnertut umiarsuaatitta Kalaallit Nunaata killeqarfiini atortitsineq suliassaraat, umiarsuit sumiiffinni pingaarutilinniittarput imartamik nakkutilliineq qulakkeerniarlugu, Issittumi Sakkutooqarfimmi attaveqaqatigiinnermik sulialik ilisimatitsivoq.
Misissugassarpassuit
Kommunit sikumik aserorterinermik ikiorneqarnissamik qinnuiginnikkaangata, Issittumi Sakkutooqarfiup taamaaliortoqarsinnaanersoq nalilersoqqaartarpaa.
- Saaffigineqaraangatta umiarsuarmik qaqugu qanillisoqassanersoq takusarparput, umiarsuaq sikumik aserorterinissamut periarfissaqarnersoq, aammalu ullunik taakkununnga immikkoortitsisoqassanersoq misissortarlugu. Kommunilu namminersortunik sikumik aserorterisinnaasunik misissuisimanersoq aamma qulakkeeqqaartussaavarput. Tikilluta taamaaliunnginnitsinni kommuni periarfissanik allarpassuarnik misissueqqaartartussaavoq. Suliffeqarfiimmi namminersortut sikumik aserorterineq aningaasarsiutigaat. Uagullu aningaasarsiornerat akornuserlugu tikittassanngilagut. Sikumik aserorterinnginnitsinni misissugassarpassuupput, taanna oqaluttuarpoq.
Inuiaqatigiit arlalitsigut tapersersoraat
Issittumi Sakkutooqarfiup sikumik aserorterinerup saniatigut inuiaqatigiit assigiinngitsutigut tapersersortarpaat.
- Politiit tapersersortarpavut, assartuinernik, ajoqusertoqartillugu ikiuulluta, aamma pisariaqartitsisoqartillugu qulimiguulinnik ikiuisarpugut. Kommunit, peqqinnissaqarfik aamma politiit assigiinngitsorpassuartigut ikiortarpavut. Kisianni Issittumi Sakkutooqarfik nunaqarfinni qanoq malugineqartigisarnersoq naluara. Takukulaneqarsimanissarput qularnarpoq, Camilla Broholm oqarpoq.
Umiarsuaq alapernaarsuut Lauge Koch, sapaatip-akunnerani kingullermi nunaqarfiup Nuussuup eqqaaniippoq, taanna Upernaviup avannaani 150 kilometerisut ungasitsigisumiippoq, tassani sikumik aserorterisoqarpoq, Polaroil nunaqarfimmut tikissinnaaniassammat.