Issittumi Sakkutooqarfiup maqaasineqartunik pingasunik ujaasiffiusoq annertusivaat
Oqartussat innuttaasunit nutaanik paasissutissanik pissarsipput, angutillu pingasut maqaasineqartut ujarneqarneranni ujaasiffiusoq annertusivaat.
Angutit maqaasineqartut pingasut, arfininngormat Ilulissat tungaanut angalasut, ajoraluartumik suli nassaarineqanngitsut, Issittumi Sakkutooqarfik pingasunngornermi ullaakkut Facebookimi ilisimatitsivoq. Pingasunngornermi ujaasiffiusoq annertusineqarpoq.
Issittumi Sakkutooqarfik naapertorlugu oqartussat marlunngornermi sumiiffimmi aamma Qeqertamit Ilulissanut aqqutigineqarsinnaasuni ujaaseqqissimapput.
- Umiarsuaq alapernaarsuut LAUGE KOCH, timmisartoq Challengeri aamma Air Greenlandip qulimiguuliutaa Issittumi Sakkutooqarfimmit ujaasitinneqarput, naak tamarmik ilungersorlutik suliaqaraluartut, angutit taakku pingasut suli maqaasineqarput, Issittumi Sakkutooqarfik allappoq.
Pingasunngornermi timmisartoq Challenger ujaasitinneqassaaq, innuttaasuniillu saaffiginnittoqarnerata kingorna ujaasiffiusoq annertusineqarpoq.
Timmisartoq kippasinnerusumut kujasinnerusumullu ujaasissaaq
- LAUGE KOCH Qeqertap aamma Ilulissat akornaniiginnassaaq ujaasilluni, tassanilu innuttaasut ikiuinissaat kissaatigineqarpoq. Timmisartoq Challengeri kippasinnerusumut kujammullu ujaasissaaq, silaannarmiillu ujaasineq nalunaaqutaq 10 missaani aallartissasoq naatsorsuutigineqarpoq, Issittumi Sakkutooqarfik allappoq.
Innuttaasut maqaasineqartunik ujaaseqataasimasut oqartussat aamma qutsavigaat.
Angutit maqaasineqartut arfininngormat Pocamik qaqortumik assiaqutitalimmik aamma Suzukimik 225 hk-mik motoorilimmik Qeqertamit aallarput. Ataasinngornermi suli tikissimanngillat, taamaattumillu ujaasineq aallartinneqarpoq.
- Innuttaasut nalinginnaanngitsumik takusaqarunik, imaluunniit suliamut tunngasumik paasissutissaateqarunik, Kalaallit Nunaanni Politiit attaveqarfigissavaat, Issittumi Sakkutooqarfik allappoq.