Issittumi sillimaniarneq pillugu Mette F. ernumassuteqartoq

Ukrainemi sorsunnerup Issittumi sillimaniarnermi politikki sunnerpaa. Issittullu sakkuaaffiusussaannginnera ajornakusoornerulerpoq.

Danskip politikerii nuimasut arlallit Folketingimi sapaatip akunnerani matumani oqallinnermi taama ernumassuteqarlutik oqarput.

Oqallinnermi folketingimut ilaasortaq Aaja Chemnitz Larsen (IA) aperivoq ministeriunerup Mette Frederiksenip Issittumi sillimaniarnermut killiffik pillugu qanoq isumaliornersoq.

Ernumalluni taanna akissuteqarpoq:

Rusland sukasimaartoq

- Ernumagilluinnarpara, Rusland nunat tamalaat akornannut sanilliullugu maanna sakkortulluinnarmat. Ukrainemi eqqaanilu kisimi pinngilaq, aammali Afrikami, Balkanimi, Belarusimi Polenillu tungaanut aamma takuarput, soorlu aamma Issittoq pillugu ernumanartoqartoq.

- Taamaammat ernumavunga. Sumiiffimmi sakkulersornerusoqannginnissaanik isuma isumaqatigaara, kisiannili pisut malinnaaqatigiittariaqarput (...) Ruslandilu maanna sakkortusaarneruvoq. Tamanna Issittoq pillugu sulinermi eqqaamasariaqarparput, kunngeqarfimmilu sulinermi, ministeriuneq oqarpoq.

Venstrep siulittaasua, Jakob Ellemann-Jensen, aamma taama isumaqarpoq. Illersornissamut isumaqatigiissusiorniarnermi pissutsit nutaat tunngavigineqartariaqarput:

Ellemann: nunarsuarmi pissutsit allaanerulluinnarput

- Uangattaaq isumaqarpunga Issittoq sakkutuulersorfiussanngitsoq. Nunarsuarmili pissutsit maanna allaanerulluinnarput. Qaammatialuit matuma siorna nangaanngivilluta oqarsinnaavugut Issittoq sakkulerngusaaffiussanngitsoq, allatut oqarnissaq eqqarsaataasarsimanngilaq.

- Pissutsilli ullumikkut allaanerupput. Tamanna aamma eqqaamasariaqarparput illersornissamut isumaqatigiissusiorutta. Neriuppunga isuma tamanna naalakkersuisuni aamma Inatsisartuni isumaqataaffigineqartoq, Ellemann-Jensen oqaluttarfimmit oqarpoq.

Isumaqatigiissut Jakob Ellemann-Jensenip taasaa pingaaruteqartorujussuussaaq. Folketingimimi amerlanerussuteqartut aalajangerput illersornissamut aningaasaliissutit milliardilikkuutaanik amerlineqassasut. Aningaasalli suli agguataarneqanngillat, illersornissamullu isumaqatigiissummi inissinneqassallutik.

Aaja Chemnitz Larsenip oqalugiarnermini maluginiaqquaa Rusland Issittup 40 procenterigaa:

Nato eqqissisimatitsivoq

- Kalaallit Nunaat sinnerlugu folketingimi ilaasortartut, Issittumi pissutsit ineriartornerannut tunngatillugu ernumaamminngitsoorsinnaanngilanga, Ruslandimi Issittup 40 procentigaa. Aammali Issittumi Kalaallit Nunaata angissusaa inissisimaneralu eqqarsaatigalugu ernumanartoqarpoq. Ruslandimi Issittumiippoq, Ukrainemulli sorsunnerani Rusland suleqatigisinnaanngikkallarparput.

Natoli eqqissisimatitsivoq:

- Aammali eqqissisimavunga, Danmarkimimi ataatsimoorpugut, naalagaaffeqatigiikkatta, NATO-mullu ilaasortaagatta.