Issittumi Siunnersuisoqatigiit ataatsimeersuarnerat: Norge siulittaasuutitaqalerpoq
Issittumi Siunnersuisoqatigiit ataatsimoorussamik nalunaarummik suliaqarsimapput, ilaatigut nunap inoqqaavisa pisinnaatitaaffiinik aamma Issittumut immikkut attuumassuteqarnerannut ataqqinnittumik, tamannalu ICC-p nunani tamalaani siulittaasuata, Sara Olsvigip naammagisimaarluarpaa.
Norge pisortatigoortumik Issittumi Siunnersuisoqatigiinni siulittaasuutitaqalerpoq.
Issittumi naalagaaffinnit arfineq-pingasunit kiisalu nunap inoqqaavisa kattuffiinit, Inuit Circumpolar Council Kalaallit Nunaanni, Canadami, Alaskami aamma Chukotkami nunap inoqqaavinut sinniisuusoq ilanngullugit ullumikkut ataatsimeersuarnerisa kingorna tamanna pivoq.
Rusland ukiuni marlunni kingullerni siulittaasuutitaqarpoq, kisianni nunap Ukrainemut saassussinerata kingorna Issittumi Siunnersuisoqatigiinni ajornartoortoqarlunilu unitsitsigallartoqarnikuuvoq.
Issittumi Siunnersuisoqatigiinni ministerit ataatsimiinneri ukioq allortarlugu pisarput, nalinginnaasumillu Issittumi Siunnersuisoqatigiit ataatsimoorlutik siulittaasut nikinneranni nalunaaruteqartarput, tassa pisortatigoortumik allakkiaq, killiffinnik aamma tunngaviusunik aalajangersimasunik oqariartuuteqartoq. Taarsiullugu naalagaaffiit aamma nunap inoqqaavisa kattuffiisa, Issittumi Siunnersuisoqatigiit isumatusaartumik suleqatigiinnermut, patajaatsumik aamma Issittumi inuit akornanni oqaloqatigiinnermut oqaluttuarisaanermi immikkuullarissumik atuuffeqarneranik akuersaartoq siunnersuisoqatigiit isumaqatigiissutigaat.
Isumatusaartumik suleqatigiinneq
Nalunaarut ICC-p naammagisimaarluarpaa, siulittaasoq Sara Olsvig ilisimatitsivoq.
Issittumi Siunnersuisoqatigiit ataatsimiinnerat pimmat nuannaarutigaarput, aammalu ataatsimoorussamik peqataaffigisatsinnik tamakkiisumillu tapersersukkatsinnik nalunaaruteqartoqarnera, taanna oqarpoq, nangillunilu:
- Issittumi Siunnersuisoqatigiinni suleqatigiinnerup suli piunissaa pingaartissimavarput. Issittumi isumatusaartumik suleqatigiinnerup attatiinnarnissaa pingaaruteqartorujussuuvoq – aamma piffissami matumani ajornartumi.
Issittumi Siunnersuisoqatigiit illersornissaannut nukittorsarnissaannullu suliaqarnissamut pisussaaffeqarneq nalunaarummi akuersaarneqarpoq. Nunap inoqqaavisalu pisinnaatitaaffii, Issittumullu immikkut attuumassuteqarnerannik ataqqinnilluni aamma nunap killingi akimorlugit aamma nunap immikkoortuani inunniit inunnut suleqatigiinneq pingaartinneqarmat.
Ministerit peqataanngitsut
Nalunaarummi oqariartuutinik nukittuunik peqartoq, Sara Olsvig isumaqarpoq. Assersuutigalugu nunap inoqqaavisa aamma siunnersuisoqatigiinni taakku atuuffiat immikkuullarissoq ataqqinneqarmat:
- Issittumi Siunnersuisoqatigiit aaqqissuussaanerat immikkuullarippoq, tassa naalagaaffiit aamma nunap inoqqaavi peqataatinneqarmata. Tamatumalu nalunaarummi oqaatigineqarnera pitsaasuusoq isumaqarpunga, taanna oqarpoq.
- Issittumi Siunnersuisoqatigiit isumatusaartumik suleqatigiinnissamik qulakkeerinninniarnermut tunngatillugu immikkuullarissumik inissisimaneranik nalunaarummi ataqqinnittoqarnera soorunami aamma pitsaasuuvoq. Taamatut suleqatigiinneq Issittumi patajaatsitsinermik, eqqissinermik aamma oqaloqatigiinnermik qulakkeerinneqataavoq.
Ukioq maanna Issittumi Siunnersuisoqatigiinni ilaasortat ministerit ataatsimiinnerat taaneqarpoq Arctic Council Meeting, Issittumi naalagaaffinni nunanit killerneersut ministerii peqataanngimmata, tassa Ruslandimut angalanissartik kissaatiginnginnamikku. Akerlianik atorfilittat peqataapput.