KL

DK

Issittumi tunngaviusumik ilinniarneq: - Neriuppugut inuusuttut suliffissaqanngitsut periarfissatut atorluassagaat

Taamak oqarpoq oversergenti Thomas Ginnerup, Ilulissani Aasiannilu soqutiginnittunik misiliinernik ingerlatsisoqarnerata kingorna.

Asseq Aasianni assilisaq massakkut pisumeersoq, tassani Illersornissaqarfiup inuusuttunut nassuiaapput Issittumi tunngaviusumik ilinniartitaanermi periarfissat pillugit nassuiaasut, ilinniarnissamik kajumissaarilluni ilinniartoqarfiit ataatsimoorlutik saqqummiussisaqattaarnerannut tunngatilugu angalaqatigiinneranni massakkut pisumeersoq.
Jensine Berthelsen
Published

Thomas Ginnerup illersornissaqarfimmeersoq naammagisimaarinnilluarpoq manna tikillugu tikitaminni soqutiginninneq taamak annertutigimmat, taassumalu qularutiginngilaa ilinniartut siulliit 20-it, 6. maj 2024-mi aallartittussat nassaarineqassaqqaartut.

- Maannamut qinnuteqartut arlaqalereerput, maluginiarparali soqutiginnittut amerlanerit tassaasut ilinniakkamik ingerlatsereersut imaluunniit suliffeqareersut, neriuutigisorujussuuarput inuusuttut suliffeqanngitsut ilinnianngitsullu, matumani periarfissaq ilinnialernissamut periarfissatsialattut isigissagaat piukkunnassusertillu pillugu misilitsissaasut.

Ilinniarnermi atugassarititaasussat:

  • Ilinniarnerup nalaani akissarsiat: 8.492,76 kr./qaammammut. Tamatuma saniatigut ineqarneq, nerisaqarneq, angalasinnaatitaaneq ilinniarnerullu nalaani atisassat ilaallu ilanngullugit akeqartinneqassanngillat.
  • Ilinniarnerup sivisussusia: Qaammatini arfinilinniit ukioq ataaseq tikillugu.
  • Ilinniarneq pingaartumik Kangerlussuarmi ingerlanneqassaaq, taamaattorli aamma Sisimiunut aammalu Danmarkimi Jyllandip avannaanut ilinniarnerup ilaani angalasoqassaaq.
  • Qinnuteqarnissamut killiliussaq: 31. december 2023.

Oqaatsitigut piginnaasaqarnissamik piumasaqaatitaqanngilaq

Thomas Ginnerup ilisimatitsivoq inuusuttut aarlerissutissaqanngitsut anguneqarsinnaanngitsutut misinnartunik piumasaqaateqartoqarnissaanut, assersuutigiinnarlugu oqaatsitigut piginnaasat pillugit:

- Uagutsinnut pingaaruteqarpoq erseqqissaatigissallugu ilinniarneq aalajangersimasumik oqaatsitigut allatigullu piumasaqaatitaqanngimmat, soorlu assersuutigalugu danskisoorsinnaaneq piumasaqaataanngimmat Issittumi tunngaviusumik ilinniarnermut atatillugu, misilitsinnerit inummiit inummoorput aammalu allattariarsornertalimmik misilitsittoqartarpoq kiisalu peqqissutsikkut misissortittoqartarluni.

Taassuma erseqqissaatigaa Illersornissaqarfiup ilinnniarumasinnaasunik misilitsitsinerannut atatillugu suleqatiminnik kalaallisut oqaluttumik peqateqarlutik, taamaalilluni attaveqaqatigiinneq ajornaquteqanngitsumik ingerlanneqarsinnaaniassammat.

Misilitsinnerit ingerlanneqarnerat imatut aaqqissuussaavoq:

  • 24. oktober: Ilulissat
  • 26.-27. oktober: Aasiaat
  • 30.-31. oktober: Sisimiut
  • 2.-3. november: Nuuk
  • 8. november: Qaqortoq
  • 13.-14. november: Tasiilaq

Periarfissarpassuit ammarneqassapput

Issittumi tunngaviusumik ilinniartitaaneq qaammatini arfinilinni ingerlanneqartassaaq, tassanilu ilinniarnermi upalungaarsimanermut ilinniartitaaneq qitiutinneqassaaq. Tamatumali saniatigut aamma Illersornissaqarfiup ilinniarnissamut periarfissaanut allanut ingerlaqqinnissamut periarfissaqalersitsissaaq una ilinniarneq naammassineqarpat, kiisalu illersornissaqarfiup avataani, soorlu qatserisartutut imaluunniit politiitut aamma ilinniartoqarsinnaassalluni angusisimagaanni.

- Meeqqat atuarfianni angusatit naammaginarsimanngippata, tamanna uniffigiinnaqinagu. Isumatusaallaqqissuuguit peqqissuuguillu ilinniarnissamullu kajumissuseqaruit, taakku immini piukkunnaataapput Illersornissaqarfiup pingaartitai. Ilinniarnerup nalaani ilikkagassat aqqusaartornerisigut timikkut tarnikkullu nukittussutsit annertusarneqassaaq, taamak kaammattuuteqarpoq overgersent Thomas Ginnerup.

Issittumi tunngaviusumik ilinniartitaaneq sukumiinerusumik paasisaqarfigerusukkukku UNA qupperlugu paasissutissanik pissarsisinaavutit.

inuiagatigiit ilinniartitaaneq nunatsinnit
Powered by Labrador CMS