Issittumiit kalerrisaarineq: Siku aattorduuvoq

Qanoq iliuuseqarsinnaannginneq tamanit nukillalaarnarnerpaajuvoq.

Siku qajannarsisimavoq, qamuteralaat sikukkut nakkartarput, piniariarnissarlu ajornakusoornerulersimammat Canadamiut ilaqutariit imminnut pilersornissartik ajornartorsiutigilerpaat.

– Uagulli nammineerluta qanoq iliuuseqarsinnaannginnerput tamanit ajornerpaajuvoq, tamannalu pissutigerpiarlugu Københavniliarpugut, Jesse Tungilik Politikenimut oqarpoq.

Taanna 25-nik ukioqarpoq Nunavumilu Canadap issittortaani qaasuitsup killeqarfiata avannaaniittumi najugaqarluni.

Massakkorpiaq silap pissusaa pillugu Københavnimi ataatsimeersuartuniippoq, Verdernsnaturfonden WWF-ip tupersuani Københavnimi Kongens Nytorvimiittumi suleqataalluni.

Tassani inuusuttut Canadameersut Kalaallit Nunaanneersullu Issituni silap pissusaata allanngoriartornera paasisitsiniaassutigaat.

– Ajornartorsiutaavoq uagut kisitta nammineerluta iliuuseqartariaqartutut misigisimagatta. Canadami naalakkersuisuniit naammattumik ikiorneqanngilagut, Jesse Tungilik oqarpoq.

– Ikiorneqarnissamik pisariaqartitsivugut. Inuiaqatigiit ikittunnguit atugaasa pitsanngorsarnissaannut, ilisimasanik pissarsinissamut attaveqarnissamullu aningaasanik amigaateqarpugut. Ajornartoiutaavorli aaqqiissutissanik atorsinnaasunik sulissutiginnittoqanngimmat.

Ilaatigut Canadami naalakkersuisut sioqqanik usserutitalinnik issittuni piiaanerat uniteqquaat, taamaaliorneq ikummatissanik taamaattunik piiaanerit mingutsitsinarnersaralugulu nukissamik atuinarnerpaartarimmassuk, CO2-millu aniatitsinarnerpaartaralugu.

– Taamaaliorneq Nunarsuarmi aseruinarnerpaarpaajuvoq, Canadamilu naalakkersuisut unitsinissaat iluaqutaasorujussuussagaluarpoq, Jesse Tungilik oqarpoq.

Sermeq atorlugu nanuusaliaq Nytorvip avataaniittoq Københavnimi ukiup silaa kiangaarmat aalluni nungulerpoq.

Nannup saarngisa ilaat sermimiit nuisaannalereerput, Janice Grey qungujulluni oqarpoq.

– Oqarsinnaavugut uagut neriulluartuulluta, inuilli puisiniit nannuniillu navianartorsiornerupput, oqarpoq.