Isumaginninnermi inatsisitigut isumannaatsuunissaq aarlerinartorsiortinneqartoq
Kalaallit ilaqutariit qallunaanut ilaqutariinnut sanilliullutik meeqqaminnik angerlarsimaffiup avataanut akulikinnerusumik inissiiviginnitsinneqartarput, kisianni kalaallit angajoqqaat silassorissutsimut misilitsissut akerlerineqartoq atorlugu qanoq akulikitsitsigisumik misissorneqartarsimanersut ministerip akisinnaanngilaa. Tamanna ernumanartorujussuuvoq, Folketingimut ilaasortaq oqarpoq.
Karina Adsbølip, Folketingimi attaviitsuusup, isumaginninnermut ministeri Astrid Krag (S) qinnuigisimavaa, Danmarkimi kalaallinut meeqqanut angajoqqaat, piffissami 2018-imit 2021-mut angajoqqaatut piginnaasanik misissuinermut atatillugu, qasseriarluni silassorissutsimut misilitsissut WAIS-4 imaluunniit Rorschach-test atorlugu misissorneqarsimanerannik nassuiaateqaqqullugu.
Aviisi Sermitsiaq taama allappoq.
Apeqqut ilaqutariit kalaallit misilitsissutit tamakkua atorlugit misissorneqartarnerannik Sermitsiami allaaserisat tunngavigalugit apeqqutigineqarpoq, naak misilitsissutinik tamakkuninnga kalaallinut, kulturikkut oqaatsitigullu allaanerusunik tunualiaqutaqartunut, atuisarneq »kanngunartuliaasutut« Aarhus Universitetimi udviklingspsykologimi professorimit Dion Sommerimit oqaatigineqarsimagaluartoq.
Naatsorsukkanik pigisaqartoqanngilaq
Astrid Kragip arlaleriarluni oqaatigisimasani uteqqippaa, »Danmarkimi naalakkersuisut Danmarkimi meeqqat sumiginnaagaanermut atugarliornermullu illersoraat, qanorluunniit tunuliaqutaqarnerat apeqqutaatinnagu.«
Tamatuma saniatigut erseqqissaatigaa, Danmarkimi meeqqanut inuusuttunullu pisariaqartitsisunut ikiuineq sapinngisamik pitsaanerpaaq tunniunniarneqartartoq.
Aviisimi Sermitsiami atuarnerusinnaavutit. Aviisi uani pissarsiariuk: