Isumaginninnermut aqutsisoqarfiup angajoqqaarsiat tapersersorneqarneri pitsanngorsaaviginiarpai
Isumaginninnermut aqutsisoqarfiup angajoqqaarsianut innuttaasunullu angajoqqaarsianngornissamik soqutiginnittunut nittartagaq nutaaq qaammatit marluk iluanni saqqummersissavaa. Nittartakkami angajoqqaarsianut paasissutissat tamakkiisut atuarneqarsinnaassapput.
Meeqqanut angerlarsimaffiup avataanut inissinneqarsimasunut angajoqqaarsiaaneq pillugu paasissutissat amigaataapput. Aasianni angajoqqaarsiaq Kirsten Karlsen taama isumaqarpoq, paasititsiniaanerit pisinnaatitaaffinnullu pisussaaffinnullu tunngasunut paasissutissat pissarsiareriaannaaneri angajoqqaarsianngorusulersitsisinnaasut taassuma Sermitsiaq.AG-mut oqaatigaa.
Taakkununnga tunngasut Isumaginninnermut aqutsisoqarfiup piareersaleruttorai Isumaginninnermut aqutsisoqarfiup ataaniittumi angajoqqaarsianut tunngasunut immikkoortortaqarfimmi pisortap Stina Sværdip Sermitsaq.AG-mut paasissutissiissutigaa.
- Angajoqqaarsianut tunngasut paasissutissat tamaasa Isumaginninnermik aqutsisoqarfiup katersuleruttorpai. Taakku paasissutissat Sullissivimmiilissapput angajoqqaarsianngorusuttunullu kommunimut qinnuteqarnissamik immersuiffissamik iserfissaqarluni, immikkoortortami pisortaq oqarpoq.
Paasissutissat tamaasa katersoraat
Innuttaasunut angajoqqaarsianngorusuttunut akuersissuteqalersut kommunip maanna paasissutissanik tamakkiisumik tuninissaat pisussaaffigaa. Paasissutissalli innuttaasunut soqutiginnittunut iserfigeriaannanngornissaat anguniarlugu Isumaginninnermut aqutsisoqarfiup ataatsimut katersorpai.
Paasissutissat katersorneqartut:
- Angajoqqaarsiaaneq sunaana
- Angajoqqaarsianut pisinnaatitaaffiit pisussaaffillu
- Angajoqqaarsiaanerit assigiinngitsut – attaveqaatit, oqilisaassisut, tassanngaannartumik inissiiviusartut
- Piumasaqaatit aningaasarsiallu
- Inatsisit atuuttut
- Kommuninut qinnuteqarniartunut iserfissat
- Nittartakkatigut qinnuteqartoqarsinnaanngorlugu kommunit piareersimaffigeqqullugit kaammattorpagut, taamaasilluta paasissutissanut quppernitsinnut atassusersinnaaniassagatsigit innuttaasullu qinnuteqarsinnaanerat ajornannginnerulersillugu, Stina Sværd oqarpoq.
Qupperneq Sullissiviup nittartagaani qaammatit marluk iluanni saqqummersinneqassaaq.
Nittartakkatigut paasititsiniaanerit
Isumaginninnermut aqutsisoqarfiup angajoqqaarsiaanermut tunngasunut paasissutissat inatsisillu pissarsiarineqariaannanngorlugit suliarinerisa saniatigut aqutsisoqarfiup innuttaasunut angajoqqaarsianngornissamik soqutiginnittunut nittartakkatigut paasititsiniaanerit ingerlannissaat pilersaarpaat. Nittartakkatigut paasititsiniaalluni ataatsimiititsinerit angajoqqaarsianngornissamik soqutiginnittut amerlisarnissaannik siunertaqarpoq. Tassa meeqqanut angerlarsimaffiup avataanut inissinneqarsimasunut angajoqqaarsiaasartut amerlanerit kommuninut qinnuteqarsinnaaleqqullugit.
- Sullissisut siunnersuisartullu peqatigalugit nittartakkatigut ataatsimiititsinissat ullulernissaat piariissavarput, taamaalilluta innuttaasut internetsimut attaveqarunik angerlarsimaffimminninngaanniit peqataasinnaanngortillugit. Taamaaliornikkut amerlanerusunut siammasinnerusunullu angajoqqaarsiaaneq pillugu paasissutissanik siammarterisinnaavugut, immikkoortortaqarfimmi pisortaq oqarpoq.
Nittartakkatigut paasititsiniaalluni ataatsimiititsinerit qaammatit marlukkaarlugit ingerlanneqartassapput, aningaasarsiutigalugu angajoqqaarsianngorusuttunut soqutiginnittunut iserfigineqarsinnaallutik. Ataatsimiititsineq siulleq 2023-p aasaanerani pinissaa naatsorsuutigineqarpoq.
- Nittartakkatigut paasititsiniaalluni ataatsimiititsinerit meeqqanut angerlarsimaffiup avataanut inissinneqarsimasunut innuttaasunut angajoqqaarsianngorusulersitsinissaa neriuutigaarput, oqarpoq.
