Isumaginninnermut pisortaq: Sullissisut ikinnerusunik suliaqalernissaannut siunnersuuteqartoqalerpoq

Meeqqat akornanni akissarsissutigalugu atortittartoqarsimasinnaanera, Meeqqat pillugit Angalaqatigiit 2022-mi Sisimiunut angalanerminni paasisaat pillugu, Qeqqata Kommunianit Sermitsiaq.AG oqaaseqartitsiniarsimagaluarpoq.

Kommunilli isumaginninnermut pisortaata tamanna oqaaseqarfigissanagu paasissutissiissutigaa, nassuerutigaali nunap sinnerani pissutsit assigalugit, isumaginninnermi ingerlatsivik unammilligassaqartoq.

- Ilisarisinnaalluarpara isumaginnittoqarfimmi sulisut suliassarpassuaqartarnerat. Isumaginninnermi sullissisut qanoq amerlatigisunik suliaqartarnerat pillugu nalunaarusiornikuuvugut, taannalu kommunalbestyrelsep oqaluuserereerpaa.

- Kommunalbestyrelsip allaffeqarfimmut piumasaraa isumaginninnermi sullissisumut ataatsimut suliassat amerlassusaasa ikinnerulernissaat pillugu siunnersuuteqassasugut. Siunnersuut kommunalbestyrelsimit isummerfigineqassaaq, Qeqqata Kommuniani isumaginninnermut pisortaq Paneeraq Olsen oqarpoq.

Suliat issiaviit marluk akornanni sapaginneqartartut

Meeqqat pillugit angalasartut ukiumoortumik nalunaarusiaanni unamminiarnartoq alla tassaavoq meeqqat kommunimit kommunimut allamut nuukkaangata suliat kommunimiittut malinnaatinneqanngitsoortarnerat.

Paneeraq Olsenip Sermitsiaq.AG-mut oqaatigaa kommunit ajornartorsiut eqqumaffigigaat, tassa meeqqat ikiorsiissutaannut inatsit naapertorlugumi meeqqap angajoqqaavisaluunniit nuunnerat malillugu kommunip meeraq pillugu suliaa kommunimut nuuffigineqartumut ingerlateqqittartussaavaa:

- Suliap qanoq isillugu malinnaatinneqartassanersoq kommunit akornanni ajornartorsiutaammat, ajornartorsiut tamanna kommunit isumaginninnermut pisortaasa ataatsimiinneranni siusinnerusukkut oqaluuserisassanngortissimavara, tunuartikkallarnikuulluguli.

- Tamanna oqaluuserisassanut ilannguteqqinniarpara, kommunimmi suleqatigiittariaqarput meeqqap nuunnerani allaffissornikkut ajornannginnerusumik ingerlasoqaqqullugu, kommuninimi tamani ajornartorsiut nalunngilarput. Meeqqap, angajoqqaap imaluunniit isumaginnittuusup kommunimit kommunimut allamut nuunnerani suliat qanoq tunniunneqartarnissaannut allakkallu suut nassiunneqartarnissaannut kommunini ersarissunik malittarisassaqartariaqarpugut. Tamanna naammassiniassavara, Sermitsiaq.AG-mut oqarpoq.

Supervisionit aaqqissuulluagaanerusut

Isumaginnittoqarfimmi sulisuinnaanngitsut suliassarpassuaqartarput. Ilaqutariinnut sullissivimmi ilaatigut meeqqanik kinguaassiutitigut atornerlunneqarsimasunik katsorsaasut aamma artukkerneqarsinnaasarput. Meeqqat pillugit angalasartoqatigiit nalunaarusiaminni erseqqissarpaat psykologit supervisionertinneqartarnissaat pingaaruteqartoq.

- Tamanna oqaloqatigiissutigereerparput, Paneeraq Olsen oqarpoq nangillunilu:

- Tarnip pissusaanik ilisimasallit pisariaqartitsineq naapertorlugu supervisererneqartarput, suliassat oqimaatsut suliarikulasarmatigik, ilaatigut meeqqat kinguaassiutitigut atornerlugaasimasut oqaloqatigisarnerisigut. Sulissutigaarpulli aaqqissuulluagaanerusumik superviseriisarnissaq, soorlu tarnip pissusaanik ilisimasallit pisariaqartitaat aallaavigalugu qaammatikkuutaartumilluunniit superviseriisarnissaq, nassuiaavoq.

Erseqqissarpaa meeqqat kinguaassiuutitigut atornerlunneqartarnerat kannguttaatsuliorfigineqartarnerallu kommunip akuerinngilluinnaraa.

- Tamatta, innuttaasugutta, angajoqqaajugutta, sullissisuugaluarutta, ilinniartitsisuugaluarutta, meeqqerivinni sulisuugutta, politikeriugutta oqartussaasuniluunniit allani issiagaluarutta – tamatta – akisussaaffipput tigusariaqarparput meeqqanik kinguaassiuutitigut atornerluineq kannguttaatsuliornerillu akiorniarlugit. Ataatsimoorutinngikkutsigu meeqqat kinguaassiuutitigut kannguttaatsuliorfigineqartarnerat atornerlunneqartarnerallu unitsissinnaanngilarput. Kinguaassiuutitigut kannguttaatsuliorneq atornerluinerlu unitsinneqarnissaat tamatta soqutigisariaqarparput, Qeqqata Kommuniani atugarissaarnermut pisortaq Paneeraq Olsen oqarpoq.