Isumalioqatigiissitap innersuussutai arfineq-marluk Naalakkersuisunut tunniunneqarput

Saammaateqatigiinnissamut isumalioqatigiissitami siulittaasup tulliata, Dorthe Katrine Olsenip, isumalioqatigiissitap isumaliutersuutai innersuussutaalu Naalakkersuisut siulittaasuata tullianut Sara Olsvigimut (IA) tunniuppai.

Tamanna Nuummi kulturikkut illorsuarmi Katuami, tallimanngormat, aaqqissuussinermi pivoq.

Aajuku Naalakkersuisunut innersuussutigineqartut:

Kalaallit Nunaata oqaluttuarisaanera – uagut isitsinnik isigalugu

Innersuussutigineqarpoq, uagut nunatsinni qangaanerusoq pisut oqaluttuarineqarnissaat siunertaralugu, inuiattut siunnerfimmik iliuusissatullu pilersaarummik ineriartortitsinissarput.

Oqaluttuarisaaneq aamma saammaateqatigiinneq pillugit ilisimasanik katersivik

Saammaateqatigiinnissamut Isumalioqatigiissitami ilaasortat innersuussutigaat, oqaluttuarisaanermik aamma saammaateqatigiinneq pillugit ilisimasanik katersivimmik Ilimmarfimmiissinnaasumik pilersitsisoqartariaqartoq.

Saammaateqatigiinnermut aningaasaateqarfik

Saammaateqatigiinnissamut Isumalioqatigiissitami ilaasortat innersuussutigaat, saammaateqatigiinnermut aningaasaateqarfimmik pilersitsisoqarnissaa, tassannga periutsinik katsorsaariaatsinillu ineriartortitsineq tapersersorneqassaaq, katsorsaataaqataasinnaammat nunatsinni innuttaasut katsorsaanermik periutsimut tunngaviusumik eqqarsaatersuutinik pilersitseqataaffigisaat aamma innuttaasut ataatsimoorfigisinnaasaat, tamatumalu saniatigut inuiaqatigiinni najugakkatsinni nukittuffiit amerlaqisut ersersinneqarlutik.

Naleqartitat ataatsimoorussat

Naleqartitanik ataatsimoorussanik ineriartortitsiniarluni siunnerfimmik aamma iliuusissatut pilersaarummik ineriartortitsisoqartariaqartoq. Anguniarneqarpoq inuiaqatigiinni nukimmik ataqatigiissitsisumik pilersitsinissaq aamma meeqqat tamarmik uagut inuiaqatigiittut inuuffigisatsinni inuunerminnik pitsaasumik aallartitsinissaat anguniarlugu ataatsimoorussatsinnik akisussaaffeqarnissarput.

Kalaallit oqaasiinik nukittorsaaneq

Oqaatsit pillugit inatsimmi anguniakkat ilumut atuutsinneqaleqqullugit, taamaaliornikkut kalaallisut oqaatsit nukittorsarneqaqqullugit inuiaqatigiinni sutigut tamatigut – angajoqqaat, meeqqerivinni sulisut, atuarfinni, ilinniarfeqarfinni aamma suliffeqarfinni tamaginni – ilungersuussilluni ingerlatsisoqarneratigut.

Utoqqatsertitsinissamik kissaat

Naalakkersuisut pineqartoq pillugu innuttaasut tamarmik isumaat saqqummersinniarlugit Kalaallit Nunaata iluani oqallitsitsinermik aallarniissasut, innersuussutigineqarpoq.

Kiffaanngissuseqarluni, sioqqutsisumik aamma paasissutissiisumik akuersineq

Saammaateqatigiinnissamut Isumalioqatigiissitami ilaasortat innersuussutigaat, Naalakkersuisut qulakkeertariaqaraat qitiusumit aqutsisoqarfiup taassumalu ataani suliffeqarfiit siunissami qulakkeertassagaat innuttaasut kiffaanngissuseqarlutik, sioqqutsisumik aamma paasissutissiisumik akuersinissamut pisinnaatitaaffeqarnissaat, inuiaqatigiinni allannguinernik annertuunik pilersaarusiortoqartillugu, innuttaasut ataasiakkaat inuunerannut sunniuteqartussanik. Taamaaliornikkut siornatigut kanngutsaatsuliorsimanertut ittut pitsaaliorneqassapput uteqqinneqaratillu.

Saammaateqatigiinnissamut isumalioqatigiissitami ilaasortaapput, Josef Therkildsen (siulittaasoq), Dorthe Kathrine Olsen (siulittaasup tullia), Ida Mathiassen aamma Iisaavaraq Petrussen. Karla Jessen Williamsson ataqqinaammik ilaasortaavoq.