Isumaqatigiinniarnerit ingerlaqqipput
Kingusinnerpaamik sapaatiuppat naalakkersuisoqatigiittussat paasinarsissapput, Kuupik Kleist oqarpoq.
Inuit Ataqatigiit aamma Demokraatit, Atassutip kiisalu Kattusseqatigiit Partiiata akornanni isumaqatigiinniarnerit tallimanngorneq nal. 15.30 unitsinneqarallarput.
- Isumaqatigiinniarnermi alloriaqqippugut. Politikkikkut tunngavissat oqaluuserinerisa saniatigut naalakkersuisoqarfiit oqaluuseralugit aallartippugut, Kuupik Kleist sermitsiaq.gl-imut oqarpoq.
Taammaattorli oqaaseqarfigerusunngilaa susassaqarfiit qanoq agguaanneqarnissaat, kisianni erseqqisaatigalugu partiit sisamat suli tamarmik peqataasut.
- Tunngaviusumik apeqqutit pingaarnerpaat isumaqatigiisutigaavut tassa pineqarput innuttaasut inuuniarnermikkut atugarisaat, kisianni suli amigaatigaavut suli itinerusumik makku oqaluuserinissaat piffissaq ungasinnerusoq eqqarsaatigalugu iluarsiissutissat inuussutissarsiutinut tunngasut, nunanut allanut tunngasut aamma susassaqarfiit allat, Kuupik Kleist oqarpoq.
Naliivoq sapaatip ingerlanerani isumaqatigiissuteqavinnissamut periarfissaqarluartoq.
Demokratit siulitaasuat Jens B. Frederiksen suli isumalluarpoq, kisianni pingaartillugu sivisuumik atasussamik isumaqatigiissuteqarnerup anguneqarnissaa.
- Tamanna imarisamigut tangeqarluartariaqarpoq kiisalu isumaqatigiissut peqaasut tamarmik 100 procentimik tapersersortariaqarpaat, imaassanngilarmik ukip affaa qaangiuppat assigiingitsut mikisualuit pillugit ikinngutigiikkunnaartugut.
Katusseqatigiit Partiiata siulittaasua Anthon Frederiksen isumaqatigiinniarnerit ingerlanerat pillugu nuannaarpoq.
- Oqallinnermut peqataavugut aamma isumalluarnissamut tunngavissaqarpoq, oqarpoq.
Atassutip siulittaasua Finn Karlsen oqaaseqartissinnaasimanngilarput.
Isumaqatigiinniarnerit arfinngornermi ingerlaqqissapput.