Isumaqatigiissut inissippoq: Kangiata Illorsua sananeqarnissaminut piareerpoq

Sulineq 2019-ip aallartinnerani aallartissaaq, 2021-milu aasakkut Kangiata Illorsuata atoqqaarfissiornissaanut piariissasoq naatsorsuutigineqarpoq.

Namminersorlutik Oqartussat tusagassiuutinut nalunaarummi taama ilisimatitsipput.

- 2019-ip aallartinnerani Kalaallit Nunaanni illoqarfiit anginerpaat pingajuanni Ilulissani KJ Greenlandimit maskiinarsuit ingerlanneqalernerat tamanna pinngortitamut asseqanngitsumut 2004-mi UNESCO-p nunarsuarmi kingornussassatut allattuiffianut ilaatinneqalersumut Kangiata Illorsuanik titartaasup ataqqinninnermik takorluugaqarfigalugu aallartisarnissaanut kalerriutaassaaq, suleqatigiit taama oqarput.

Paasititsiniaavik

Ukiualunnguit qaangiuppata ingerlatsivik atoqqaarfissiortinneqalerpat ingerlatsivittut paasisitsiniaavittut atuutilissaaq, aamma Kalaallit Nunaanni tikeraat pingaarnertut ornittagarisaattut illoqarfimmi Ilulissani takornariartitsinermik ineriartortitsinermik nukittorsaaqataassaaq. Sumiiffiup oqaluttuarisaanermi aamma kultureqarnermi oqaluttuarisaanermi tunngaviusutut sermeq pillugu oqaluttuassartamik paasissutissiisassaaq, aamma ilaatigut silap pissusaata allanngornerinik najukkami nunarsuarmilu pingaaruteqassusia ukkataralugu oqallissaarusiarisassavaa.

- Sermersuaq aamma kangerluk sermeqarfiusoq pillugu alutornartorsuarmik oqaluttuassartamik Kangiata Illorsuata takornariat assissaqanngitsumik misigisassanik tunniussaqarfigissavai. Taamatuttaaq Kangiata Illorsuanut kangerluup sermip aniaffiata eqqaani, sermermiuni nunaqarfiusimasup eqqaani, nunaannarmi alianaatsumi assigineqanngitsumik toqqammaveqarluni inissisimassaaq. Taamaattumik takornarissanik amerlasuupilussuarnik aggersaasussatut takornarissanit ornigarneqaatigisussanngussagaa naatsorsuutigaara. Ukiumi nutaami sanaartornerup aallartinnissaa ukiumilu 2021-imi piareerluni naammassineqarnissaa qilanaaraara, Inuussutissarsiornermut Nukissiuuteqarnermullu Naalakkersuisoq Aqqalu Jerimiassen oqarpoq.

Suleqatigiit

Namminersorlutik Oqartussat aamma Avannaata Kommunia suleqatigalugit – aammalu illumi saqqummersitanut paasisitsiniaanermut Nordea-fondenimit tapiissuteqarfiulluni – Kangiata Illorsua sanaartornissaanut Realdania isumaginnittuuvoq. Kangiata Illorsuanut sanaartortitsisussaq tassaavoq Realdania By & Byg, Realdaniap ingerlatsivia, sanaartornerup aallartinnissaanut piareersimalernera ingerlatsivimmit nuannaarutigineqarpoq:

- Qaasuitsup killeqarfiata avannaani sanaartortoqaraangat sivikitsumik sanaartorfissat nalaanni aamma silap pissusaanik atoruminaatsumi tamatigut siulittuutigisinnaanngisanut aarleqqutissanullu oqaatigereersinnaasanik peqartarpoq. Ilulissani Kangiata Illorsuaq illutassaa piuminaatsumik unammillernartumillu iluseqassaaq, eqiterunnerit marloqiusatullu najungasunik iluseqassalluni. Taamaattumik suliniutip iluarsaanneranut, immikkuualuttunut titartarnerinut naatsorsuutinullu kiisalu illup napatitsisutut sisannik sananeqaataasa sanaartornissaannut piareersaanermut piffissarujussuaq atortariaqarsimavarput. Maannakkut suut tamarmik inissipput, 2019-illu aallartinnerani illuliornerup aallartinnissaanut suut tamaasa piareernerat nalunaarutigisinnaalerlugu, illunik titartaasartoq aamma suliniummik siulersuisoq Realdania By & Bygimeersoq Frants Frandsen oqarpoq.

Ukiumut alakkaasartorpassuit

2017-imiilli Avannaata Kommunia sanaartorfigissaanermik ingerlassaqarsimavoq. 2019-imi upernassalerpat illuliorneq aallartippat siullermik sanaartorfissaq piareersaarneqarnissaaq, ilaallutik qaqqap qaarsuinik qaartiterinerit, toqqamavissat ikkussuiffissaanik qaarsortami qillerinerit suliassat ikigisassaanngitsut akornani aallarniutaasapput.

Kangiata Illorsua, illunik titartaasartup Dorte Mandrupip titartagarisaa ukiumut tikeraanik 25.000-it missaannik ornigarneqartarnissaa naatsorsuutigineqarpoq.