Isumaqatigiissut isornartorsiorneqartoq borgmesterip illersorpaa: Sulisulli piginnaanngorsarneqassapput

Qaanaami utoqqaat illuata peqqinnissaqarfimmi uninngasunit napparsimaveqarfittut aamma atorneqartarnera, utoqqaat illersuisuata Inga Egedep isornartorsiornikuuaa.

Sulisut najugaqartullu toqqissisimanngillat, utoqqaat illersuisuat ilaatigut taama oqarpoq.

Utoqqaat illuanni sulisut akornanni toqqissisimanngitsoqartoq, Avannaata Kommuniani borgmesterip, Palle Jerimiassenip uppernarsarpaa:

- Napparsimmavimmit uninngasunik utoqqaat illuannut angallassisoqaraangat toqqissisimaneq ajorput, uninngasut sumik napparsimanerannik suussusersiffigineqarsimanerat paasitinneqarneqe ajormat, qanorlu ikiorneqarnissaat ilisimatinneqartannginnamik.

Pikkorissarnerit neriorsuutigineqartut pissarsiarinngikkaat

- Uninngasut akisussaaffigisatik arlaannik pilerpata qanoq iliornissaminnut tunngatillugu toqqissisimanngillat, Palle Jerimiassen oqarpoq.

Utoqqaat illuata napparsimmavittut atorneqartalernerata kingorna sulisut pikkorissarneqarsimannginnertik imaluunniit ilinniarteqqinneqarsimannginnertik, borgmesterip oqarnera naapertorlugu toqqissisimannginnermut pissutaanerpaavoq.

Peqqinnissaqarfiup kommunillu 2020-mi isumaqatigiissuteqarnerisigut taama aaqqiissuteqartoqarpoq:

- Piginnaanngorsartitsilluni pikkorissaasoqartussaavoq, taakkulu peqqinnissaqarfiup tungaanit suli ingerlanneqanngillat.

- Sulisut toqqissisimannginnerannut taakku pissutaaqataapput. Sulisut uninngasunut iseraangamik qanoq iliortarnissamut sinaakkutinik perusupput, nakorsaatillu suut pigissanerinut tunngatillugu, Palle Jerimiassen oqarpoq.

Isumaqatigiissut illersoraa

Taamatut kommunip peqqinnissaqarfiullu akornanni aaqqiisoqarsimanerani ajornartorsiuteqartoqaraluartoq aamma utoqqaat illersuisuata isumaqatigiissutip atorunnaarsinneqarnissaanik piumasaqaraluartoq, isumaqatigiissut borgmesterip illersorpaa:

- Sulisussanik amigaateqarpugut, isumaqatigiissullu iluaqutitaqarpoq, taakkulu ingerlatiinnarniarpagut.

- Utoqqaat amerlasuut nakorsanit ikiorneqarnissamik pisariaqartitsisarput, peqqinnissaqarfimmi sulisut aamma suleqataagaangata tamatuma suliarput oqinnerulersittarpaa, taanna oqarpoq.

Utoqqaat illuanni najugaqartut uninngasut ingerlanneqartarnerannit akornusersorneqartartut, utoqqaat illersuisuata oqaatigaa, utoqqaallu utoqqaat illuanni najugaqarfimminni eqqissisimanissamut piumasaqartut oqaatigalugu.

Taamatut isornartorsiuisoqarnerani borgmesterip isumaa allanngunngilaq, utoqqaat illuinilu allani taamatut pisoqartartoq oqaatigaa, uninngasut piffissami sivikitsumi utoqqaat illuaniitinneqartartut. Taakku atugassarititaapput, borgmesteri oqarpoq.

Palle Jerimiassenip oqarnera naapertorlugu kommunip Qaanaami isumaginninnermut pisortaa maanna peqqinnissaqarfimmut attaveqarpoq, kommunip peqqinnissaqarfiullu akornanni aaqqiissummullu atatillugu marsip aallartinnerani ajornartorsiutit pillugit ataatsimiititsisoqassaaq. Tamatuma saniatigut borgmesterip suliaq peqqissutsimut naalakkersuisumut Mimi Karlsenimut (IA) qaqinniarpaa.