Isumaqatigiissut: Kalaallit Nunaat meeqqat nerrivianni issiavoq
Illersornissaq pillugu isumaqatigiinniarnerni Kalaallit Nunaata peqataatinneqartarnera naammaginanngitsoq Folketingimi ilaasortaq isumaqarpoq, naalakkersuisullu oqaatigaa oqaloqatigiinnerit amerlanerusut qilanaaralugit.
Illersornissaqarfiup nukittorsarnissaanut Folketingip 16 milliardit koruunit sisamanngormat immikkoortippai, aningaasallu ilaat Kalaallit Nunaanni suliniutinik annertusaanermut atorneqartussaapput.
Ilaatigut droninik ungasissumukarsinnaasunik nakkutilliisunik pisinissaq pineqarpoq. Issittumi piginnaasanik annertusaanissamut isumaqatigiissut 2021-mi atsiorneqarmat pisinissamut 750 millionit koruunit immikkoortinneqarsimapput, aningaasalli naammanngitsut paasinarsivoq, taamaattumillu aningaasat 2,7 milliardit koruuninut annertusineqarput.
- Dronit ungasissumut ingerlasinnaasut pillugit politikkikkut isumaqatigiissutip atuuttup malinneqarnerata saniatigut, Issittumi tunngaviusumik ilinniarfimmut Kalaallit Nunaanni qinnuteqartoqarujussuarnera siunissami tapersorsinnaagipput, isumaqatigiissutip immikkoortuata siulliup qulakkeerpaat. Kalaallit Nunaanni illersornissatsinnik isumannaallisaanermillu nukittorsaaneq aamma kalaallit innuttaasuinut iluaqutaassasoq uannut pingaaruteqarluinnarpoq, Namminiilivinnermut Nunanullu Allanut Naalakkersuisoq, Vivian Motzfeldt (S), tusagassiuutinut nalunaarummi oqarpoq.
Oqaloqatigiinnerulernissani qilanaaraa:
- Naalakkersuisut isumaqatigiissummut siullermut peqataaneratigut isumaqatigiissutit tulliuttut pillugit danskit naalakkersuisuinik suleqateqarnissatsinnut sinaakkutaavoq. Illersornissamut ministerimik, aammali Inatsisartuni partiinik oqaloqateqarnissara qilanaareqaara.
Aaja: Meeqqat nerrivianni Kalaallit Nunaat
Folketingimut ilaasortaq Aaja Chemnitz Sermitsiaq.AG-mut oqarpoq isumaqatigiinniarnerit ingerlanerat naammagisimaarnagu:
- Kalaallit partiivi illersornissamut isumaqatigiissusiornermut peqataatinneqartassasut Danmarkimi naalakkersuisut tunngavianni allassimavoq. Ajoraluartumilli isumaqatigiinniarnernut tamanut peqataaneq ajorpugut. Ilaqutariittut nalliuttorsiornermut qaaqqusinermi Kalaallit Nunaannik meeqqat nerriviinut ingitsitsinertut tamanna assersuunneqarsinnaavoq.
- Naalakkersuisut Inatsisartullu peqataatinneqarnissaat pingaaruteqarnerpaavoq, danskinili partiinik isumaqatigiinniarnernut peqataaneq ajorput. Taamaattumik qallunaat partiivi isumaqatigiissuteqareeraangata Naalakkersuisut, Inatsisartut kalaallillu folketingimi ilaasortat isumaqatigiissut pillugu saqqummiussivigineqartarput. Uannut tamanna naammaginanngilluinnarpoq, Aaja Chemnitz oqarpoq.
Aamma oqarpoq “Kalaallit Nunaanni sakkussiornerulernissaq kissaatiginagu, isumaqatigiissummimi aallaasit qaartartut eqqartorneqarput”.
- Kalaallit inuiannut inuiaqatigiinnullu iluaqutaasinnaasut isiginiarnerusariaqarpavut. Issittumi tunngaviusumik ilinniagaqarneq aamma Kalaallit Nunaannik alapernaarsuisarneq IA-p siunnersuutigisimasaanut innuttaasunit ujartorneqarluartunut assersuutissaalluarput. Tamakku amerlanerulersittariaqarpavut, oqarpoq nangillunilu:
- Isumaqatigiissummi nutaami umiarsuarnik timmisartunillu pisoqaasunik taarsersuinissaq aamma immap naqqatigut kabelit illersorneqarnissaat IA-p pingaartissavai.