Isumaqatigiissutitigut nittartakkakkut sillimaniarneq pitsaanerulersinneqassaaq
Kalaallit Nunaanni nittartakkakkut sillimaniarnerup pitsanngorsarneqarnissaa anguniarlugu Center for Cybersikkerhed, Danmarkimi Naalagaaffiup isertortumik paasiniaasarfianut attuumassusillit, Digitalimik Sullissinermut Aqutsisoqarfillu suleqatigiinnissamut isumaqatigiissuteqartut, Namminersorlutik Oqartussanit ilisimatitsissutigineqarpoq.
Kalaallit Nunaat ukiuni kingullerni marlunni qarasaasiatigut tulleriaattumik saassunneqartarsimavoq.
Ilaatigut oqartussat akornanni Namminersorlutik Oqartussat peqqinnissaqarfillu saassunneqarsimallutik. Aaamma Namminersorlutik Oqartussat ingerlatseqatigiiffiutaat Royal Greenlandi siorna decembarip qaammataani soriarsinnaajunnaartillugu qarasaasiatigut saassunneqarsimavoq, maannakkorpiarlu Kommuni Kujalleq saassunneqarsimanerminit ilungersuuteqarluni.
Namminersorlutik Oqartussanit maanna ilisimatitsissutigineqarpoq, nunami maani nittartakkatigut sillimaniarneq pitsanngorsaaffiginiarlugu Center for Cybersikkerhed (CFCS) Digitalimik Sullissinermut Aqutsisoqarfik isumaqatigiissuteqarfigineqartoq.
Tassa CFCS Digitalimik Sullissinermut Aqutsisoqarfimmi sulisunut pikkorissaassaaq, taassumalu saniatigut Kalaallit Nunaanni nittartakkakkut paasissutissanillu paarinninneq pillugu CFCS Digitalimik Sullissinermut Aqutsisoqarfimmut siunnersuisassalluni.
- Kalaallit Nunaat aamma ulorianartorsiortinneqartoq
CFCS-ip aamma Digitalimik Sullissinermut Aqutsisoqarfiup attaveqaatit mianernartut immikkut illersorneqarnermik iluaquteqarsinnaasut misissussaavaat:
- Suleqatigiinnermi Kalaallit Nunaanni oqartussaqarfiit siliffeqarfiillu naapertuuttut CFCS-ip attaveqarfiannut inississorneqarsinnaapput. CFCS-ip attaveqarfiannut ikkunnikut nittartakkatigut saassunneqassagaluarunik ikiorneqarnissaat periarfissaqarneruvoq, Namminersorlutik Oqartussanit tusagassiorfitsigut nalunaaruteqarlutik allapput.
Naalakkersuisut Siulittaasuata Múte B. Egedep (IA) CFCS-imit taperserneqarneq pingaaruteqarnerarpaa:
- Ukiuni kingullerni Kalaallit Nunaanni suliffeqarfinni namminersortuni oqartussallu suliffeqarfiutaanni nittartakkatigut saassussinerit malunnartumik amerleriarsimapput. Nunat tamalaat akornanni navianarsinnaasut maanna Kalaallit Nunaannut aamma anngussimapput.
Naalagaaffiit avataaneersut pinerlunniarlutillu hackerisartut ulorianartorsiortitsiuartut
- Taamaattumik pingaaruteqarpoq Kalaallit Nunaanni nittartakkakkut paasissutissanillu paarisaqartarnermut tunngatillugu pikkorissunit siunnersorneqartariaqartugut kiisalu piginnaanernik qaffassaanissaq ukkatarineqartariaqartoq. Tamanna qulakkeerniarlugu Center for Cybersikkerhedimut isumaqatigiissuteqarpugut, Múte B. Egede tusagassiorfitsigut nalunaaruteqarnermi oqarpoq taama oqarpoq.
CFCS-imi pisortap Thomas Flarupip oqaatigaa, udtaler, naalagaaffiit avataaneersut pinerlunniarlutillu hackerisartut Kalaallit Nunaanni nittartakkatigut ulorianartorsiortitsiuartut.
- Naalagaaffiit avataaneersut pinerlunniarlutillu hackerisartut Kalaallit Nunaanni nittartakkatigut ulorianartorsiortitsiuarput. 2022-p ingerlanerani nittartakkatigut saassussinerit arlallit naammattoorpagut, taakkua Kalaallit Nunaanni inuiaqatigiinni sullissiniarnernut arlalinnut sunniuteqarsimapput, ilaatigut qitiusumik allattoqarfimmi innuttaasunut sullissiviit ajutooqqasimapput aammalu peqqinnissaqarfiit saassunneqarsimallutik. Saassussinerit pineqartut takutippaat nittartakkatigut saassussinissamut ulorianartorsiornerit qanoq sakkortutiginersut.
- Nittartakkatigut paasissutissanillu paarinnittarneq pillugu suleqatigiissuteqarnitsigut pingaaruteqarluinnarpoq ersarissumik suleqatigiiffissagut suussusersineqarnissaat, qanoq iliorluta ingerlatsineq aammalu Kalaallit Nunaanni nittartakkatigut sillimaniarneq qulakkeerneqarsinnaappat?, Thomas Flarup oqarpoq.
Tassunga tunngatillugu CFCS ingerlaavartumik Kalaallit Nunaanni Naalagaaffimmilu nittartakkatigut saassusisinnaasut nalilersorneqarnerinik Kalaallit Nunaannut anngussisalissaaq.