Vittu pillugu
Isumasioqatigeereernermi paasisat naammaginngilai
Vittus Qujaukitsup Inatsisartut ataatsimiititaliaannut ullumi nassuiaateqarpoq.
Naalakkersuisoq Vittus Qujaukitsoq Inatsisartut nunanut allanut sillimaniarnermullu ataatsimiititaliaanut nassuiaateqarnera demokraatineersup Justus Hansenip naammaginngilaa.
Isumasioqatigiinnermi naalakkersuisup sapaatip akunnerata ingerlanerani Danmarki pillugu danskit aviisiannut sooq taama isornartorsiusimanerluni, Trumpillu suleqatiserineranut tunuliaqutini isumasiunngivillugit sooq tamaaliorsimanerluni nassuiaateqarfigaa.
- Suli naammaginngilara paragraf 37-lu naapertorlugu apeqquteqarnerma akissutisinissaa utaqqiinnartariaqarlugu, ataatsimiititaliami siulittaasup tullia Justus Hansen Sermisiaq.AG-mut oqarpoq.
Atuaruk: Kim Kielsenip tusagassiortunit katersortitsinera
Ataatsimiinnermit eqqartorneqartunut nipangersimasussaatitaanini pissutigalugu oqaaseqarsinnaanani aamma oqaatigaa.
Paragrafili 37 naapertorlugu apeqqutit saqqummiunneqarnikuupput.
Justus Hansen Randi Vestergaard Evaldsen peqatigalugu pingasunngormat Naalakkersuisunut Qujaukitsup USA Pituffimmit anisinniarnerarlugu sioorasaarinera piviusunngortinneqassanersoq apeqquteqaatigaat.
Atuaruk: Vittu ingerlaannassaaq
Apeqquteqaataasa ilaat ima nipeqarpoq:
- Naalakkersuisut ilisimanerlugu Namminersorneq pillugu inatsimmi § 21 imm. 1-mi allassimasoq, tassani atuarneqarsinnaammat "Kalaallit Nunaata namminiilivinnissaanik aalajangerneq inuiaat kalaallit aalajangernerannik tunngaveqassaaq" aamma Naalakkersuisut isumaat naapertorlugu Namminersorneq pillugu Inatsimmi paragrafi taanna qanoq ililluni Nunanut Allanut Naalakkersuisup siorasaarutaanut attuumassuteqarpa?
Justus Hansenip Randi Vestegaard Evaldsenillu paragraf 37 naapertorlugu apeqquteqarnerat ullut qulit qaangiutsinnagit Naalakkersuisunit akissuteqarfineqassaaq.