itsarnisarsiorneq
Itsarnitsat asiunnginnerini katersugaasiviit annaassiniassapput
Nunarsuup kissatsikkiartornera pissutigalugu Issittumi itsarnitsat erianartut ulorianartorsiortinneqarput - nutaamik misissuinikkut tamakkua annaanniarneqassapput
Itsarnitsat tammariaannanngulersimapput.
Tassami nunarsuup kissatsikkiartornera pissutigalugu Kalaallit Nunaanni Issittumilu sumiiffinni allani itsarnitsat pigineqartut suujunnaariaanngorsimapput.
Taamaattumik Københavnimi Nationalmuseeet aamma Kalaallit Nunaata Katersugaasivia Allagaateqarfialu 2016-imiit Nuup eqqaani itsarnitsanik annertuumik misissuinialerput, taamatut pingasunngormat allappoq aviisi ullormut saqqummersartoq Politiken.
Issittsumi simiiffiit itsarnisarsiorfiit nalissaqanngitsuupput, pissutigalugu itsarnitsat ukiuni tusintilippassuarni tamaani nunami qeriuaannartumi toqqortarineqarajuttarmata.
Taamaattumik assanneqaraangamik amerlanerpaatigut allanngujaalluinnartarsimapput. Itsarnitsalli aakkunik asiuartussapput imaluunniit oqunnik mikroorganisminillu allanik aserorsarneqassallutik.
Ilisimatuut samminiagaasa ilagaat attakut, tamakkua dna-mik ilisimatuunut atortussanik nalissaqanngitsunik takutitsisinnaammata.
Tamanna pisimavoq ilisimatuut Københavns Universitetimeersut 2010-mi kalaallip nujai ukiunik 4000-nik pisoqaassusillit misissormatigit, nunarsuarmi siullersaallutik itsaq inuit inunnguusaannik tamakkiisumik takutitsisumik, Politiken allappoq.
Nunat katersugaasiviisa marluullutik Københavns Universitetimi Center for Permfrostimi ilisimatuut peqatigalugit sapinngisartik tamaat itsarnitsat suujunnaannginnerini annaanniarsarissavaat, Nationalmuseumimi Afdeling for Miljøarkæologi og Materialeforskningimi seniorforsker Jørgen Hollesen Politikenimut oqarpoq.
– Itsarnitsat tamaasa annaassinnaanngilagut, tamanna ajornarluinnarpoq. Kalaallit Nunaanni itsarnisaqarfiit 6000-t nalunaarsorneqareersimapput, tamakkualu marloriaammik amerlanerulluarsinnaapput. Annertunerusumilli paasisaqarfigisinnaavarput silap kissatsikkiartornera itsarnitsanut, assersuutigalugu attakuniittunut, qanoq kinguneqarsinnaanersoq.
– Tamannalu paasisaqarfigigutsigu siunissami nalileruminarnerulissaaq itsarnitsat silap pissusiata allanngoriartorneranik qanoq aseruaterneqartiginersut.
– Taamaasilluta periusissaqalissaagut aalajangiisinnaanissatsinnut qaqugukkut assaanissaq pisariaqarnersoq, itsarnitsat naleqarluartut attatiinnarniarlugit. Inortuitinnatalu taamaasiussaagut, Jørgen Hollesen Politikenimut oqarpoq.