Ittoqqortoormiuni piniarneq unittoorluinnaqqasoq
Ittoqqortoormiuni piniartutut inuussutissarsiuteqarneq aatsaat taamak ilungersunartigisumik inissisimalersimasoq, ilaqutariinnut piniartukkormiunut siunissamut ernumalersitsivoq. Qilalukkanik qernertanik immikkut pisassiisoqarnissaannik piniartut qinnuteqaataat Naalakkersuisunit itigartinneqarpoq. Piaarnerpaamilli immikkut pisassiisoqarnissaa Sermersuup kommuniani kommunalbestyrelsimi ilaasortamit piumasarineqarpoq
Ittoqqortoormiuni piniartut isertitaasa amerlanerpaartaat qilalukkat mattaannik neqaanillu tunisinermi isertinneqartarput. Pisassiissutilli 50-it aasaq julimi tamakkerneqareerput.
Sermitsiaq allappoq.
Qinnuteqaat itigartinneqartoq
Illoqarfiullu eqqaanni maannakkut qilalugaqarluartoq, piniartut isiginnaaginnartariaqarpaat. Ittoqqortoormiit eqqaat nanoqarluarmat, ukioq manna nannuttassiissutit 35-it aprilimi tamakkerneqarput. Puisit amii maanna tunisaanngillat, ammillu nammineq atugassat tiguneqareeraangata, amerpassuit sinneri eqqaannarneqartarput.
Aarrit aamma maanna piniagaanngillat. Taamaattumik Ittoqqortoormiit eqqaani piniagassaqarluaraluartoq, piniartut piniagassatik isiginnaaginnartariaqarpaat. Saarullinnik qaleralinnillu aalisarneq iluatsitsiffiuneq ajorpoq, aalisagaasannera pissutaalluni. Aalisarnerlu inuussutissarsiutigeqarsinnaanngimmat illoqarfimmi aalisakkeriveqanngilaq. Taamaattumik piniartut qilalukkanik 30-nik immikkut pisassiisoqarnissaanik Naalaakkersuisunut qinnuteqarput, tamannali itigartinneqartoq, Namminersorlutik Oqartussani Aalisarnermut Piniarmut Nunalerinermullu immikkoortortaqarfimmi pisortaq, Amalie Jessen oqarpoq.
Allaaserineqartoq aviisimi Sermitsiami tamakkiisumik atuarneqarsinnaavoq. Aviisi uani pisiariuk: