Ivaaqqap kingorna suliniutit pillugit nalunaarusiaq: Malittarisassat malikkuminaatsut

Inuit innarluuteqartunut najugaqarfissatut neqeroorutini malittarisassat nutaat, tassa unnuarsiortut sulisut marluutinneqalerneri aamma nangilersuinermi asattuinermilu sulisut marluusarnissaat, ilaannakortumik iluatsissimavoq.

Malittarisassat erseqqissarneqarsimapput arnaq innarluuteqartoq Ivaaqqami najugaqartilluni kinguaassiuutitigut atornerlunneqarsimanera paasineqareersorlu.

Sulisulli maluginiarpaat najugaqartut ilaat toqqissisimajunnaartartut sulisoq ataaseq nangilersuinermi asattuinermilu suliaqartillugu, sulisoq alla najuuttutut isersisimaannaraangat, nalunaarusiami arlaannaatigulluunniit attuumassuteqanngitsumik misissuisuninngaanniit allanneqarsimasumi atuarneqarsinnaavoq.

- Pisuni amerlasuuni ineqartumut tamanna sakkortullunilu iluaaginarsinnaavoq, sulisup ataatsip kisimi najugaqartup uffarnerani ikiuunnissaa pisariaqartinneqarsimatillugu. Perorsaaneq aamma ileqqorissaarneq eqqarsaatigalugit ulloq unnuarlu najugaqarfissatut neqeroorutini arlalinni toqqaannannginnerusumik periuseqarluni suliniummik aaqqiinissaq toqqarneqarsimavoq, inunnut innarluutilinnut najugaqarfissatut neqeroorutini kinguaassiuutinut tunngasutigut pissutsit aamma kinguaassiuutitigut innarliisarnerit pillugit nalunaarusiami allassimavoq.

Nangilersuisoqalernerani suleqatit ilisimatinneqartassasut

Unnuarsiortut marluusalernissaannut malittarisassaq ajornaquteqanngitsumik atuutsilersinneqarpoq. Uggaanermili nangilersuinermilu sulisut marluusarnissaat ilaanni naammassiuminaattartoq, ilisimatitsissutigineqarpoq.

Nangilersuinermili allatut aaqqiissuteqartoqarsinnaanera nassuiarneqarpoq:

- Sulisut nangernik taarsersuisartorujussuupput, aamma najugaqartunik ullut tamaasa asattuisarlutik. Sulisut akornanni oqaluuserisorujussuunikuuarput, nangermik taarsiisoqassatillugu, aamma tamatuma sumi pinissaa sulisut tamarmik ilisimassagaat. Anartarfimmi pisartutut namminermut tunngassaaq aamma soorunami najugaqartoq eqqarsaatigineqassalluni. Kisianni nangermik taarsiilerneq sulisut ilisimassavaat, sulisoq nassuiaavoq.

Sulisussaaleqineq ilungersunartoq

Ulloq unnuarlu neqeroorummi aqutsisup ataatsip nassuiarpaa sulisussaaleqineq ilaanni pissutaatillugu nangilersuinermi sulisut marluusarnissaat naammassiuminaattartoq.

Inunnut innarluutilinnut najugaqarfissatut neqeroorutini arlaannaannulluunniit attuumassuteqanngitsunit misissuititsineq, Ivaaqqami arnap innarluuteqartup kinguaassiuutitigut atornerlugaanermi kingorna siorna erneriasaarneranit tunngaveqarpoq. Angut ukiuni marlunni qaammatinili qulingiluani pineqaatissinneqartussanngorlugu eqqartuunneqarpoq, inunnillu innarluuteqartunik ukiuni tallimani tullerni sullissisinnaassanngitsoq aamma aalajangerneqarluni.