Ivaaraq pillugu suliaq: Atornerluinerit qaammatip aappaa avillugu ingerlasimapput
Ivaaraq pillugu suliami unnerluussisussaatitaasup piumasaraa taarsiissuteqarnissaq inuillu timikkut tarnimikkulluunniit innarluutillit najugaanni sulisinnaanermut pisinnaatitaaffiiarneqassasoq. Unnerluussut naapertorlugu Ivaaqqami atornerluisarnerit qaammatip aappaa avillugu sivisussusilimmi pisarsimapput.
Angut 62-inik ukiulik Kujallermi Eqqartuussivimmi sisamanngornermi 20. september eqqartuunneqartussanngorpoq. Taanna arnamik, eqqarsartaatsimikkut nappaatilimmik innarluutilimmillu arlaleriarluni kinguaassiutitigut atornerluisimasutut atoqateqarniartarsimasutullu unnerluunneqarpoq.
Unnerluussummi, Sermitsiaq.AG-p allagaatinik takunnissinnaaneq atorlugu tigusaani, nassuiarneqarpoq arnaq najugarisami Ivaaqqami najugaqartoq, 15. november 2021-miit 1. januar 2022 ilanngullugu arlaleriarlugu atornerlunneqarsimasoq.
Kinguaassiutitigut atornerlunneqartarsimanerup kingorna arnaq naartulersimavoq, 2. september 2022-milu meerartaarluni.
Sulisinnaaneq taarsiisussanngornerlu
Unnerluutigineqartup ukiuni marlunni qaammatinilu qulingiluani pineqaatissinneqarsimasunut inissiisarfimmiinnissaa unnerluussisussaatitaasup piumasarigaa paasineqareerpoq.
Unnerluunneqartoq eqqartuussivimmi pisuutinneqarpat, unnerluussisussaatitaasup ilanngullugu piumasaraa pineqartoq utoqqaat illuini, angerlarsimaffinni illersukkani assigisaaniluunniit ukiuni tallimani tullerni sulisinnaassanngitsoq. Tassa imaappoq inuit innarluuteqartunik paaqqutarinniffinni sulisinnaanissaanik pisinnaatitaaffiiangaagallassasoq.
Maanna oqaaseqassanngitsut
Unnerluussisussaatitaasup ilanngullugu piumasaraa unnerluutigineqartoq mitalliisimasututut 80.000 koruuninik taarsiissuteqartinneqassasoq.
Angut eqqartuussivimmi killisiorneqarluni novemberimi sassartinneqarami arnamik 22-mik ukiulimmik kinguaassiutitigut atornerluisimanini nassuerutigaa. Suliamut tunngatillugu unnerluutigineqartup unnerluussutit maanna qanoq isumaqarfiginerai Sermitsiaq.AG-p illersuisuusoq aperaa.
- Pitsaanerusoraarput illersuisup isummernera eqqartuussivimmi aqagu aatsaat tusartinneqarpat, illersuisoq Finn Meinel Sermitsiaq.AG-mut oqarpoq.
Kalaallit Nunaata Politiivisa Ivaaqqamut tunngatillugu paasiniaanerit tamakkerlugit naammassisimagitsik ilisimatitsissutigaat.
- Suliami paasiniaanerit sukumiisut ingerlanneqareersullu, nalilerparput pinerlunnernik allanik pisoqarsimanissaa takussutissaqanngitsoq, vicepolitiinspektør aamma paasiniaanermi ingerlatsisoq, Lars Bjerregaard ilisimatitsivoq.