Ivaaraq pillugu suliaq: Unnerluussisup ukiut marluk qaammatillu qulingiluani 62-inik ukiullip inissiisarfimmiinnissaa piumasaraa
Ivaaraq pillugu suliamik taaneqartoq sapaatip-akunnerani matumani eqqartuussiveqarfimmi aallartinneqartussaavoq, unnerluussisullu unnerluutigineqartup ukiut marluk sinnerlugit pineqaatissinneqarnissaa piumasaraa.
2022-mi pinerluttulerinermi suliat uissuumminartut Eqqartuussiveqarfik Kujallermi suliarineqassaaq.
Ivaaraq pillugu suliamut tunngavoq, taamanikkut arnaq annertuumik innarluutilik 22-nik ukioqartoq naatsorsuutigineqanngitsumik nukappiarannguamik qitornartaartoq paasineqarmat, suliaq taanna siorna septembarip aallartinnerani aallartippoq.
Arnaq oqaaseqarpianngitsuullunilu pisussinnaanngilaq, suliarlu taamaattumik pinngitsaaliilluni atoqateqartoqarneranik misissorneqarpoq.
Politiit pisoq annertuumik malinnaaffigineqartumik misissorpaat, qaammatillu marluk qaangiuttut angut 62-inik ukiulik Ivaaqqami sulisoq tigusarineqarpoq.
Ukiuni marlunni qaammatinilu qulingiluani inissinneqarnissaa piumasarigaat
Taanna arnap annertuumik innarluutillip qitornaanut ataataasoq, DNA-mik misissuinerup takutippaa, politiillu oqarnerat naapertorlugu, novembarip aallartinnerani 2022-mi angutip arnaq atornerlussimallugu, tunngaviusumik inatsit naapertorlugu killisiorneqartilluni nassuerutigaa.
Angut tigusarineqarnerminiilli tigummigallarneqalerpoq, sisamanngorpallu suliami aalajangiisoqassaaq.
Kalaallit Nunaanni Politiini unnerluussisussaatitaasuni immikkut unnerluussisoq, Lars Petersen, angut kinguaassiutitigut pinngitsaaliisimasutut unnerluutigineqarpoq, aammattaarlu inuup eqqarsartaatimigut napparsimasup imaluunniit innarluutillip atornerlunneqarneranut paragrafimik unioqqutitsisimasutut unnerluutigineqartoq, Sermitsiaq.AG-mut ilisimatitsivoq.
- Ukiuni marlunni qaammatinilu qulingiluani pineqaatissinneqarsimasunut inissiisarfimmiitinneqarnissaa piumasaraarput, Lars Petersen, Sermitsiaq.AG-mut oqarpoq.
Eqqartuussineq eqqartuusseqataasunik peqataatitsilluni ingerlanneqassaaq, suliallu ingerlanneqarnissaanut ullumik ataatsimi suliarinninnissamut immikkoortitsisoqarsimavoq.