Jens B-p Kinamiut soqutiginninnerat uppernarsarpaa

Kinamiit aningaasaliiniartut ullumi aviisi Berlingske Business naapertorlugu 1,3 milliard koruunit tungaanut nunatsinni atortulersuutitigut aningaasaliinisartik soqutigaat.

Tamanna attaveqarnermut naalakkersuisup Jens B. Frederiksenip Demokraatineersup uppernarsarpaa.

- Kinamiut paasiniaasimapput, sulili tigussaasumik isumaqatigiissusiortoqartussaanngilaq. Isumaqagtigiinniarnerit aallarnisarneraniippugut, Jens B. Frederiksen Sermitsiaq.AG-mut oqarpoq.

Erseqqissarpaa suli sumilluunniit aalajangiisoqanngitsoq.

Læs også "Kinesere klar til at bruge milliarder i Grønland"

Berlingske Businessimi aningaasaliisinnaanerit Kinamiut præsidentiata Hu Jintaoip sapaatit akunnerani tullermi Danmarkimut tikeraarnissaannut attuumassuteqarsorineqarput. Tamannali Jens B. Frederiksenip paasinngilaa.

- Kinamiut nunatsinni atortulersuuteqarnikkut aningaasaliinissamut isumaqatigiissusiorniarunik nammineerlutik ornilluta isumaqatiginiassavaatigut, oqarpoq nangillunilu, oqaatigisinnaanagu qaqugu taamaattumik isumaqatigiissusiortoqarsinnaassanersoq.

Piumasaqaatit apeqqutaapput
Jens B. Frederiksen aamma oqarpoq nammineq apeqqutaatinngikkimi kikkut nunatsinni atortulersuutinik aningaasaleeqataarusunnersut.

- Apeqqutaangnilaq Kinamiuunersut allalluunniit atortulersuutitsinnut aningaasaleerusunnersut. Aningaasaliinerni piumasaqaatit apeqqutaalluinnarput, oqarpoqo nangillunilu:

- Pingaarluinnartuuvoq suliniutit nammineq napasinnaanissaat. Aningaasaliiniartut naatsorsuutigissanngilaat nunatsinni aningaasaliinerminni sumilluunniit akilerneqarnissartik.