aatsitassarsiortuni atorfinittoq
Jens B.: Soormi taamaasiussanngilanga
Demokraatit siulittaasuata Jens B. Frederiksenip aporfissaqarsorinngilaa Inatsisartuni ilaasortaajutigaluni aatsitassarsioqatigiiffimmi True North Gems Greenlandimi qaffasissumik atorfeqarnissani
- Aalisartut suliffeqarfinnullu allanut attuumaasuteqartut Inatsisartuni oqalliseqataasarput isorineqanngivillutik. Taamaammat aporfissaqarsorinngilara Inatsisartuni ilaasortaajutigalunga True North Gems Greenlandimi atorfeqarnissara.
Taama oqarpoq Inatsisartuni ilaasortaq Demokraatillu siulittaasuat Jens B. Frederiksen maanna True North Gems Greenlandimi qaffasissumik atorfeqalersoq. Suliffeqarfik taanna Qeqertarsuatsiaat eqqaanni Aappaluttumi rubininik qalluinissamut qinnuteqaammik tunniussereerpoq.
Atuaruk: Jens B. True North Gems Greenlandimi qaffasissumik atorfittaarpoq
Peqataasinnaannginneq
- Aatsitassanut inatsit 2009-mi akuersissutigineqarmat aatsitassarsiornissamik qinnuteqaatit Naalakkersuisunit suliarineqartussanngorlugit inissinneqarput. Taamaammat True North Gemsip Qeqertarsuatsiaat eqqaanni rubininik qalluinissamuut qinnuteqaataa pillugu sunniuteqarsinnaanngilluinnarpunga, Jens B. Frederiksen Sermitsiaq.AG-mut oqarpoq.
Taassuma ilimagereersimavaa True North Gemsimi atorfeqalernini oqallisigineqarumaartoq.
- Inatsisartut aatsitassanut ataatsimiititaliaanni ilaasortaanngilanga Naalakkersuisunilu ilaasortaanerma nalaani aatsitassanut attuumassuteqartut oqartussaaffiginagit. Aamma True North Gems Inatsisartuni oqallisaalissappat attuumassuteqarnera pissutigalugu oqalliseqataanavianngilanga, Jens B. Frederiksen oqarpoq.
Taanna siorna novemberimi siunnersuisarfimmik suliffeqarfiutitaarpoq aammalu taxaatiliusimalluni maannalu suli angallamik attartortitsisarfimmi piginneqataalluni.
Aqutsisutut ilinniarneq
- Karl Lyberth Siumumeersoq aalisartuuvoq aalisarnerlu pillugu oqalliseqataasarluni aamma Hans Enoksen Pilersuisumi atorfeqarpoq oqallinnerillu KNImut Pilersuisumullu tunngasut peqataaffigisarlugit. Tamanna apeqquserneqarneq ajorpoq, Jens B. Frederiksen oqarpoq.
Taanna isumaqarpoq inuussutissarsiutinik ingerlatsinissamut Inatsisartuni ilaasortat tunuarsimaartariaqanngitsut.
- Oqallisigiuarparput nunaqavissunik atorluaanissaq. Nunaqavissuuvunga aamma politiitut sulinerma nalaani aqutsinermut ilinniarsimasuullunga. Aamma eqqaaneqareersutut inuussutissarsiornermi misilittagaqarpunga. Taamaammat aporfissaqarsorinngilara aatsitassarsioqatigiiffimmi atorfittaarnissara, Jens B. Frederiksen oqarpoq.