Jens B.: Taamaattumik peqataanianngilagut
Demokraatit maanna nalunaarput Siumukkut naalakkersuisooqatigisinnaanagit. Sulianili aalajangersimasuni suleqatigiittarnissaq periarfissaatippaat
Naalakkersuisunngortitsiniarluni isumaqatigiinniarnerit Demokraatit peqataaffigiunnaarpaat. Taakku nalunaarput Siumukkunnut naalakkersuisooqataasinnaanatik aammalu inatsisartuni tunulequtaasinnaanatik.
- Apeqqutit uranimut inissianillu iluarsaaqqinnissamut tunngasut avissaarutaapput. Taamaammat nalunaarutigaarput Siumukkut naalakkersuisooqatigisinnaanagit, Demokraatit siulittaasuat Jens B. Frederiksen Sermitsiaq.AG-mut oqarpoq.
Nalunaaquttap akunnerata affaa missaliorlugu Demokraatit Siumukkullu pingasunngornermi ualikkut kaffisoqatigiipput tassanilu paasinarsivoq ukiuni sisamani tulliuttuni naalakkersuisooqatigiissinnaanngitsut.
- Siumukkut nalunaarutigaat sulianut angisuunut inatsit allanngortinniarlugu. Tamanna pissappat Alcoap Maniitsumi suliniutaa kinguaattuussaaq. Tamanna akuersaarsinnaanngilarput piffissami suliffissaaleqisorpassuaqarfiusumi, Jens B. Frederiksen oqarpoq.
Aammali isumaqatigiiffeqarput
Isumaqatigiinngissutit kisimik eqqartorneqanngillat. Apeqqutini ataasiakkaani Siumukkunnik suleqateqartarsinnaaneq Demokraatit ammaffigaat.
- Nalunaarutigaarput illuatungiliuttuuniarluta, tamannali suna tamaat sakkugalugu pissanngitsoq aamma ilisimatitsissutigaarput, Jens B. Frederiksen oqarpoq.
- Assersuutigalugu ilinniartitaanermut tunngassuteqartut suleqatigiissutigisinnaavagut aammalu apeqqutit pingaarutillit arlallit. Naalakkersuisooqataanngikkaluarluta aamma inatsisartuni tunulequtaanngikkaluarluta isumaqatigiissuteqartarsinnaavugut, Jens B. Frederiksen oqarpoq.