Jens-Frederik Nielsen (D): Inuuniarnermikkut ajornartorsiuteqartut pillugit siunnersuisooqatigiit pilersinnissaat pisariaqaqaaq

Demokraatit siulittaasuat, Jens-Frederik Nielsen pissutsit piviusut tunngavigalugit sulerusuppoq, Inatsisartut inatsisinik malittarisassanillu inuuniarnermikkut ajornartorsiuteqartut pillugit suliarinnittarneranni. - Siunnersuisoqatigiinnik pilersitsinissamik siunnersuutiga qalliinnarsiortumik tiguneqarpoq, neriuppungali ataatsimiititaliamit suliarineqareernermini ilusimisut iluseqarluni akuerineqarsinnaassasoq, taanna oqarpoq.

Nunatsinni innuttaasut ilarpassui toqqissisimasumik pitsaasumillu atugaqarput, taamaattorli aamma amerlassusilerneqarsinnaanngitsut inuuniarnermikkut ajornartorsiuteqartunik ilaqarpugut. - Ajunngitsumik isumaqarluni iliuuserpassuaqaraluartoq inuuniarnermikkut ajornartorsiuteqartut amerligaluttuinnarput. Taakku pillugit siunnersuisoqatigiinnik peqalerpat politikkikkut aalajangersaasarnigut pitsaanerulissapput aammalu pisariaqartitsisunut naleqqunnerusunik aalajangersaasalissaagut, Jens-Frederik Nielsen siunnersuunni pillugu tunngavilersuivoq.

Leiff Josefsen

Jensine Berthelsen

tallimann 13. okt 2023 14:21

Annonse

Inuuniarnermikkut ajornartorsiuteqartut nunatsinni qanoq pineqartarnersut pillugu politikerit akornanni akuttunngitsumik oqallisigineqartarpoq.

Oqallinnerpassuarni aaqqiissutissaasinnaasut nassaariniarsarisarpaat, taamaaliornikkut inuuniarnermikkut ajornartorsiuteqartunut ikiorseeriaatsit tapersersueriaatsillu qanoq ittut atorlugit ajornartorsiuteqartut inuiaqatigiinni peqataaleqqinnissaat ujartorneqartarpoq. Taamaattorli politikerit oqalliseqattaartarneranni isumaqatigiinniaqattaartarnerannilu inuuniarnermikkut ajornartorsiuteqartut amerligaluttuinnarput - assersuutigiinnarlugu kommunit arlallit meeqqanik angerlarsimaffiup avataanut inissiisariaqartarnermikkut aningaasarpassuit atortagaat amerligaluttuinnarlutik.

Siunnerfeqarnerusumik sulisariaqalerpugut, taamak isumaqarpoq Demokraatit siulittaasuat, Jens-Frederik Nielsen, taanna siunnersuuteqarpoq "inuuniarnermikkut ajornartorsiuteqartut pillugit siunnersuisoqatigiit" pilersinneqassasut.

Siunnersuutigineqartup taasissutissatut ilusaa aammalu Naalakkersuisullu allannguuutissatut siunnersuutaat:

Inatsisartunut ilaasortap, Jens-Frederik Nielsenip siunnersuutaa:

“Inuuniarnermikkut ajornartorsiuteqartut pillugit siunnersuisooqatigiit” pilersinneqarnissaannut Naalakkersuisut peqquneqassasut Inatsisartut aalajangiiffigisassaattut siunnersuut.

Naalakkersuisut allannguutissatut siunnersuutaat:

Naalakkersuisut kingusinnerpaamik UKA2024-mi ”Inuuniarnermikkut ajornartorsiuteqartut pillugit oqaloqatigiittarfimmik” pilersitsinissamut saqqummiussissapput. Inuit atugarisaat pillugit oqaaseqartartut pioreersut aammalu Kommunit qanimut suleqatigalugit.

- Nunatsinni inuuniarnermikkut ajornartorsiuteqartut qanoq atugaqarnersut pillugit aaqqissuussaaneq naapertuunnersoq nakkutigisinnaalluartariaqarparput. Oqalorusaarnermiit iliuuseqarnermut saattariaqarpugut, iliuuseqarnermilu inuuniarnermikkut ajornartorsiuteqartut pisariaqartitaat aallaavigalugit sulisariaqarpugut, aammami siunnersuisoqatigiinnik pilersitsisoqarneratigut uagut inatsisiliortutut paasissutissanik pitsaasunik tunngavigineqarsinnaasunillu sakkussaqalissaagut, taamaalillutalu innuttaaqativut inuuniarnermikkut ajornartorsiuteqartut kimeqarnerusumik isumaqarnerusumillu ikiorneqartarnissaat tapersersorneqartarnissaallu pillugu inatsisitigut malittarisassatigullu ersarinnerusumik malikkuminarnerusumillu tunngavissiisinnaagatta, siunnersuuteqartoq Jens-Frederik Nielsen Sermitsiaq.AG-mut nassuiaavoq.

Ajornartorsiuteqartut amerlasuut aaqqissuussanermut tunniutiinnartarput

Naalakkersuisut siunnersuummut allannguutissatut siunnersuuteqarput, taannali qalliinnarsiornerusutut oqinaariniarnertullu aammalu inuuniarnermikkut ajornartorsiuteqartunut annerusumik iluaqutaanavianngitsutut nalilerneqartariaqartoq Jens-Frederik Nielsen isummerpoq:

- Eqqaamassavarput inuuniarnermikkut ajornartorsiuteqartut akornanni amerlasuut annertuumik ilisimasaqarfiginngimmassuk aaqqissuussaaneq qanoq ilusiligaanersoq. Taakkunannga amerlasuut ullormiit ullormut inuuniarsaripput, pissutissalimmillu aarleqqutigaara taakkunannga suli amerliartortut ikiorneqarnissaminnik noqqaallutik saaffiginnikkaluarlutik suli ajornartorsiornerulersutut inissittuuginnartartut, Jens-Frederik Nielsen oqarpoq nangillunilu:

- Inuit amerlasuut, pingaartumik kinguaariaani utoqqaanerusortagut maniguuttuupput qanorlu pineqarnertik naammagiinnartarlugu. Ikiorneqaqqullutik noqqaagaluarlutik itigartinneqartutut misigisimagaangamik tunuartiinnartarput ilungersorlutillu inuuniapiloornertik nangiinnartarlugu, uffa massa pisinnaatitaaffitik malillugit eqqortumik ikiorniarneqarnerlutik ilisimanngikkaluarlugu.

- Takussutissaasut ilagaat Inatsisartut ombudsmandiata ukiut tamaasa sulianut isumaginninnermut tunngasunut isorinnilluni pissutsinillu iluarseeqqusilluni nalunaaruteqartarnera, tassani ersippoq sullissinerit ilarpassui pitsaanngitsumik ingerlanneqarsimasut.

Ataatsimiititaliamit ilalerneqarnissi neriuutigaa

Siunnersuummik suliaqarneq Inatsisartut ataatsimiittarfianni sisamanngornermi ingerlanneqarpoq. Jens-Frederik Nielsen isumaqarpoq siunnersuutip Inatsisartunit katersuuffigineqarnissaa suli neriunaateqartoq, naak Naalakkersuisut allannguutissamik siunnersuuteqaraluartut.

- Naalakkersuisut allannguutissatut siunnersuumminni oqaloqatigiittarfimmik pilersitsisoqassasoq siunnerfigeqquaat, tassani oqaaseqartartut pioreersut kommunillu suleqatigineqarnissaat innersuussutigineqarluni, pingaartumillu angerlarsimaffeqanngitsut aallaaviginiarneqarlutik. Taamaattorli isumaqarluinnarpunga siunnersuisoqatigiinnik pilersitsisoqartariaqartoq, siunnersuuteqartoq erseqqissaavoq nangillunilu:

- Manna tikillugu malunnaatilimmik inuuniarnermikkut ajornartorsiuteqartut atugarissaarnerulernissaat pillugu suliniuterpassuit aallartinneqartaraluartut angusaqangaarnikuunngilagut. Taamatut inissisimasut ukiut ingerlanerini amerliartorput, uagullu inatsisiliortutut inuiaqatigiinni ajornartorsiut taanna annertooq ilungersunartorlu kaavilukaarfigisuuserusaaginnarparput, isumaqarpungalu inuuniarnermikkut ajornartorsiuteqartut pillugit siunnersuisoqatigiit pilersinneqarpata pitsaanerusumik sulinissatsinnut sakkussaqalersinneqassasugut.

- Taamaammat neriuppunga Inatsisartuni partiit Naalakkersuisunit aaqqiissummut matumani ujartukkannut piumassuseqarnerussasut, tassami Naalakkersuisut iliuuseriniagaat ajornannginaariniartutulluunniit isigineqarsinnaagaluartoq, taamaattoq takuneqarsinnaareerpoq aaqqiissut taanna iluatsippallaarnavianngitsoq, tassami oqaloqatigiittarfimmi suleqataasussatut naalakkersuisut innersuussutigisaat suliassaqarfimminni namminneq suliassarpassuaqareerput, siunnersuuteqartoq Jens-Frederik Nielsen Sermitsiaq.AG-mut itisiliilluni oqarpoq.

Siunnersuutip aappassaaneerneqarnissaa pissaaq tallimanngornermi 10. november.