Jens Napaattooq Østre Landsretimi
Naalakkersuisunut ilaasortaasimasoq Jens Napaattooq pillugu suliaq Kalaallit Nunaata eqqartuussiviata novembar 2007-imi qaammatini sisamani pineqaatissinneqarsimasunut inissiisarfimmiittussanngortitsinermik ingerlateqqinneqartoq maanna Østre Landsretimi ingerlanneqarpoq.
Namminersornerullutik Oqartussat Jens Napaattuup ineqarnermut attaveqarnermullu naalakkersuisuunerata nalaani ilassinninnermut kontuminik atornerluisarsimasutut unnerluutiginnittuusut Landsrettip qaammatini sisamani pineqaatissinneqarsimasunut inissiisarfimmiittussanngorlugu aalajangiussaa ingerlateqqippaa, suliarlu ullumikkut Nuummi nanginneqarpoq.
Dommerit pingasut Østre Landretimeersut Nuummut tikissimapput, tallimanngorpat pineqaatissiisoqarnissaa naatsorsuutigineqarpoq.
Jens Napaattooq naalakkersuisuunerminit 2005-imi soraarsitaavoq, taamanikkut tusagassiorfiit ilassinninnermut kontuni atorlugu - ilaatigut Nuummi Charon Pornimi nerisitsisarsimanera aammalu Københavnimi Wonderbar-imi arnat atisaajartartuniissimanera tusaamasaasoq pillugit allaaserisalermagit.
Jens Napaattooq unnersuussissutini katillugit 120-ini unnerluutigineqarpoq, taakku tamarmik ilassinninnermut kontumik atuisimanermut tunngasuupput. Unnerluussissutit katillugit 128.366,25 kroninik naleqarput.
Ilaquttat, ikinngutit, parteeqatit, ilisarisimasat atorfillillu ilagalugit nereqatigiinnerit amerlaqaat, ilassinninnermut kontu atorlugu, aammalu ilassinninnermut amerlanerpaatigut tunngavilersuutaasarsimavoq "politikkimut tunngasunik oqallinnerit paasiniaanerillu".
Landsret-ip ilsimannittut 25-it aggersarpai, taakualu amerlanersaat Napaattupp naalakkersuisuunerata nalaani nereqatigiinnermut qaaqqusaasuusarsimapput. Ilsimannittulli amerlanersaat isumaqarput nereqatigiinnerit qaaqqusaaffigisatik ilassinninnermut tunngasunngitsut.