Jensenip Naalakkersuisut.gl-imi nalunaarutaa ilisimatuumit isornartorsiorneqartoq
Pisortat ingerlatsinerit politikkikkut soqutigisanit ingalassimaneqartussaavoq, taamaammat Erik Jensenip Demokraatinut oqariartuutaa Naalakkersuisut.gl-imi saqqummiunneqartussaanngikkaluarpoq, ilisimatooq nassuiaavoq.
Naalakkersuisut politikkikkut illuatungiliuttorisaminnut akissuteqarlutik nittartagaq Naalakkersuisut.gl atortussaanngikkaluarpaat. Malittarisassanik unioqqutitsineruvoq, ilisimatooq naliliilluni Sermitsiaq.AG-mut taama oqarpoq.
Naalakkersuisut tallimanngornermi ullorulersoq nalunaarutaat taama nalilerneqarpoq.
Tusagassiorfinnut nalunaarut naalakkersuisut.gl-imut ikkunneqarpoq, tusagassiorfinnut nassiunneqarluni Naalakkersuisullu Facebookimi quppernerannut aamma ikkunneqarluni.
Qulequtarineqartoq "Akitsuutit appartinnissaannut Demokraatit peqataanngillat", puunut akitsuutinut tunngatillugu isumaqatigiinnginneq tunngavigalugu isornartorsiornermik imaqarpoq.
Ilisimatooq: Atuartartut allagaannut assiguneruvoq
Tusagassiorfinnut nalunaarummi ilaatigut allassimavoq Demokraatit akisussaaffimmik tigusinngitsut, partiillu suliami pissusaa naaperiuteqarfiunngitsoq.
Sermitsiaq.AG-p nalunaarut Roger Buchimut, Danmarks Medie- og Journalisthøjskolemi Gravercenterimi ilisimatusartumut, ilinniartitsinermut kommunillu ingerlatsinerannut immikkut ilisimasaqartumut atuartippaa.
Taassuma nalilerpaa nalunaarut Naalakkersuisut.gl-imiittariaqanngikkaluartoq, pisortat ingerlatsivii partiit politikkiinut attuumassuteqanngitsumik ingerlanneqartussaammata:
- Nalunaarut nittartakkamiittoq atuartartut allagaannut assiguneruvoq, politikerip isummerneranik imaqarluni, pisortallu ingerlatsiviisa nittartagaannut ikkutassatut naleqqunnani.
Tunngaviusumik malitassanik unioqqutitsisoq
- Ingerlatsinermut inatsimmik unioqqutitsinerussaaq, ingerlatsinermi tunngaviit qitiusut "pisortani pitsaasumik pissuseqarneq" atuuttussaammata, Roger Buch Sermitsiaq.AG-mut allagaqarluni akissuteqarpoq.
Taassuma ilisimatitsissutigaa paasissutissat eqqortut nalunaarutiginissaat ajunngitsuusut, politikkikkulli illuatungiliuttunut isornartorsiuinerit ilaatinneqartut peerneqartariaqartut:
- Nalunaarut piviusut pillugit paasissutissanik imaqarpoq, taakkulu nittartakkamiiginnarsinnaapput. Politikkikkulli isummernerit pingaartummillu illuatungiliuttumut isornartorsiuinerit pisortat nittartagaaniissanngillat isumagalu naapertorlugu peerneqartariaqaraluarlutik, Roger Buch allappoq.
Ilisimatooq naapertorlugu Erik Jensenip isummernini nammineq attaveqatigiiffinni quppernermini allassimasinnaagaluarpai, tusagassiorfinnulluunniit atuartartut allagaattut nassiussimasinnaagaluarpai.
Politikkikkut isornartorsiutit nammineq tigusariaqarai
Pisortammi ingerlatsinerat partiip qalipaataanik malunnartoqartussaanngilaq:
- Pisortat ingerlatsiviisa politikerip politikkikkut suliaanik isummertussanngorlugu ikiortussaanngilaa, assersuutigalugu partiip ataatsimeersuarnissaanut oqalugiaammik isummersortumillu allakkianik saqqummersitsinissamut. Allakkiat isummersuutit siunnersuusiorfiusinnaapput - pissutsit piviusut tunngavigalugit - soorlu nittartakkami nalunaarut taama aallartittoq, politikkikkulli isummernerit illuatungiliuttuusunilluunniit isornartorsiornerit, politikerip nammineerluni suliarisariaqarpai - namminerlu attaveqatigiittarfimmini saqqummiullugit, imaluunniit tusagassiorfinnut isummersuutitut nammineq nassiullugit, Roger Buch oqarpoq.
Suliamut tunngatillugu Naalakkersuisut oqaaseqartinniarlugit Sermitsiaq.AG sulissuteqarpoq.