Jensikkut Grønlandsbankenimi saqqummersitsisut

Grønlandsbankenip inuit marluk saqqummersitaannik takuniaarusuttunut matut ammassavai, tassami Jens Lindhardtip qalipagai, aamma Jens Erik Kjeldsenip ilusilersugai tallimanngornermi apriilip sisamaanni takuneqarsinnaalissapput.

Ammaanersiorneq pissaaq Imanermi nalunaaqutaq 16.00, aningaaserivillu sassaallilaassaaq. Ammaanersiorneq tamanut ammavoq, eqqumiitsuliortullu najuutissapput suliatillu saqqummiullugit.

Saqqummersitani takuneqarsinnaapput Jens Lindhardtip meerarpaluttumik titartagai, immikkut eqqarsaallatsitsisinnaasunik allagartalersukkat. Jens Lindhardt qalipaariaaritsini pillugu ima oqarpoq:

- Ukiut makku tikissimavakka, inuunera qujamasuutigalugu, aammalu qalipaanissannut
titartaanissannullu piumassuseqaqqilersimallunga. Ullut tamaasa oqariaaseq una nuannaarutigisarpara: Inuuneq tamaat meeqqatut qalipaanissamut ilinniartariaqarpoq, Jens Lindhardt oqaluttuarpoq.

Maajip 23-ata tungaanut
Jens Lindhardtip titartagai qalipaatigissut, Jens Erik Kjeldsenillu ujaqqanik ilusilersugai aningaaserivimmi takuneqarsinnaassapput. Ilusilersukkat tamarmik ilisarnartuupput, inuit uumasullu, Jens Erik Kjeldsen-ip oqarneratut nammineq ujaqqami iluseqareersut.

- Inuit ilaat oqarsinnaapput ujarak uumassuseqanngitsoq. Kisianni uanga malugiuaannarpara ilua uumassusilerujussuusoq. Takoriataarsinnaasarpara ujaqqap ilusianiit taleq anillariasaartoq, suliarineranilu – malugilerukku assaap passianiit tillerneqalersoq, taava paasisarpara naammassilersoq, Jens Erik Kjeldsen oqarpoq.

Soqutiginnittut tamarmik, eqqumiitsuliortunit nuannersumik sunnertikkusuttut Grønlandsbankenimut alakkaasinnaapput. Saqqummersitsineq 23. majip tungaanut ingerlassaaq.