Jess G. tapersersuivoq: Neqinik eqqussinermi akitsuutit atorunnaarsinneqassapput
Neqinik eqqussinermi akitsuutit atorunnaarsinneqarnissaat nioqqutissat ulluinnarni pisariaqartut akitsoraluttuinnarneranni iluaqutissiissutissat pisariaqartut ilagaat, SIK-mi siulittaasoq isumaqarpoq.
Nerisassat akii qaffakkiartuinnarput, neqinillu eqqussinermi akitsuutinik atorunnaarsitsisoqarnissaanik siunnersuummut SIK oqallinnermut ilannguppoq.
Illuatungiliuttut Demokraatit neqinik eqqussinermi akitsuutip peerneqarnissaanik siunnersuuteqartuuvoq. Akitsuutit peerneqassappata assersuutigalugu kinguneqassaaq nersutip neqaa aserortigaq ullumikkormit 10 koruuninik akikinnerulernissaa, savaaqqallu quttoraa 2 kilo eqqunneqarsimasup 50 koruuninik ullumikkormit akikinnerulernissaa siunnerfiuvoq.
Akitsuut peerneqassappat innuttaasunut iluaqutaassasoq sulinermik inuussutissarsiuteqartut kattuffiata SIK-p siulittaasuata Jess G. Berthelsen isumaqarpoq:
Neqinik eqqussinermi akitsuutit atorunnaarsinneqarnissaat nioqqutissat ulluinnarni pisariaqartut akitsoraluttuinnarneranni iluaqutissiissutissat pisariaqartut ilagaat. Demokraatillu
siunnersuutaat tamanna Naalakkersuisooqatigiit aningaasat naleerukkaluttuinnarnerannut
akiuussutissatut iliuuseriniagaannut ilanngunneqaruni pissusissamisuuginnartussaavoq, Jess G. Berthelsen tusagassiutinut nalunaarummi oqarpoq.
Innuttaasunut ikiorsiinissamut suliniut
Naalakkersuisut nioqqutissat akiisa qaffannerisa kingunerisaanit isertitakinnerit ilungersunartorsiornerannit ikiorniarlugit suliniuteqassamaarnerat Jess G. Berthelsenip innersuuppaa. Suliniulli suli tamanut saqqummiunneqanngilaq.
Pisortatigoortumik kisitsisitigut saqqummiisoqarnikuunngilaq nioqqutissat qanoq akitsortiginikuunersut. Brugsenilli AG-mut aggustip aallartinnerani ilisimasitsissutigaa assersuutigalugu neqit qerisullu Danmarkimit eqqunneqartut 10 koruuninik akisunerulersimasut.
Ruslandip Ukrainemut saassussinera pissutigalugu uulia kiisalu angallassinermut aki qaffannikuuvoq, nunanilu tamalaani innaallagiaqarneq akisunerulernikuulluni.
Neqinik eqqussinermi akitsuutit atorunnaarsinneqarnissaat immini tamakkiisumik matussutissiisinnaanngitsoq Jess G. Berthelsen oqarpoq, allanilli assingusunik iliuuseqarnernut ilagitikkaanni pinngitsoornani iluaqutaasussaavoq ilaqutariinni ulluinnarni aningaasartuutit naammattusaarniarneranni. Iliuuserlu taamaattoq sulinermik inuussutissarsiutillit SIK-mut ilaasortaasut akornanni qujarunneqarluartussaasoq oqaatigalugu.
- Putin unammillersinnaanngilarput. Kisianni Putinip Ukrainemi sorsunnerata sunniutipilui innuttaasunut sapinngisamik oqilisarniarsinnaavavut inuiaqatigiinni nammaqatigiinnissamik
isuma tunngavigalugu ulluni oqimaatsorsiorfiusuni iliuuseqartarnitsigu, oqarpoq.