Jess Svane (S): Aaqqissuusseqqinneq iluatsinngitsoorpoq
Nunamut namminermut naalakkersuisoq, Jess Svane (S) taamak inerniliinerminut ilaatigut innersuussutigivaa innuttaasut qanimut oqartussaaqatigiinnermik amigaateqalersimallutik kommunitoqqat nappaqqinneqarnissaannik piumasaqaateqartarnerat annertusiartuinnarmat. Maannalu innuttaasut periarfissinneqartussanngorput isummaminnik annissinissaminnut aaqqissuusaanerup naammagisimaarneqarnera pillugu kingusinnerpaamik Inatsisartut ukiaanerani ataatsimiinnissaannut naammassineqareertussamik misissuisoqartussanngormat.
Qanimut oqartussaaqatigiinnerup amigaataanera pillugu naammagittaalliuutit, kommunit kattussuunneqarnerisa kingorna kommunit aningaasaataasa amerlanersaasa illoqarfinnut qitiusutut inissisimasunut taamaallaat atorneqartarnerannik naammagittaalliuutit, innuttaasunik sullissinerup qanoq ittuunissaanik kissaateqartoqaraluarluni sunniuteqarsinnaannginneq pillugu naammagittaalliuutit, nammineq najugarisami qanoq ineriartortoqartariaqarnersoq pillugu sunniuteqaqaqataasinnaannginneq pillugu naammagittaalliuutit.
Naammagittaalliuutit taagorneqartut tassaapput naammagittaalliuterpassuit ilamininngui kommunillu tallimanut "qitiusumik" illoqarfittalerlugit kattussuunneqarsimanerinik atorunnaarsitsilluni kommunitoqqat 17-it atulerseqqinneqarnissaannik piumasaqarnermi tunngavilersuutigineqartartut ilamininngui.
Kingullertigut Nanortalimmi nunaqarfittaanilu innuttaasut nikussaaqatigiipput Nanortaliup kommuninngorteqqinneqarnissaanik piumasaqaateqarlutik.
Aaqqissuusseqqinneq iluatsinngitsoortoq
Sermitsiaq.AG-mit nunamut namminermut Naalakkersuisoq, Jess Svane (S) akissutissarsiorfigaarput kommunit 2009-mili kattussuunneqarnerisa kingorna innuttaasut tungaannit naammagittaalliuuterpassuit qamikkumanngitsutut ittut qisuariarfigineqarnissaanut piffissanngunnginnersoq:
- Kingumut qiviassagutta, taava tunngaviusumik isumaqarpunga aaqqissuusseqqinneq iluatsinngitsoorsimasoq oqarluaannarluni sutigut tamatigut. Kommunimmi kattussuunneqarneranni siunertaanikuuvoq nunarput kommunillu aningaasaqarnikkut nukittunerulissasut, marloqiusamik allaffissornerujussuit atorunnaarsinneqassasut, ingerlatsinermullu aningaasartuutit annikillisarneqassasut. Taamatuttaaq siunertaanikuuvoq akisussaaffiit namminersorlutik oqartussaniit kommuninut nussorneqassasut aammalu minnerunngitsumik innuttaasut sullinneqarnerat pitsaanerulerlunilu sukkanerulissasoq. Tamakkorpassuilli pitsaanerusup tungaanut saatitsissutaasussatut kattussuutsitsinermi siunertaagaluartut ilarpassui iluatsinngitsoorput, tamannami aamma kisitsisitigut takussutissaqarpoq, tassa ataatsimut isigalugu aaqqissuuseqqinneq taanna iluatsissimanngitsutut nalilerneqartariaqarpoq.
Kommunit namminneq sulissutiginnissapput
Jess Svane ersarissumik nassueruteqaraluarluni aaqqissuusseqqinneq taanna iluatsissimanngitsoq, taamaattoq Naalakkersuisut iliuuserisinnaasaat annertunngillat, tassami kommunit namminersortuupput aammalu kommunimi atugassat pillugit namminneq aalajangisartuullutik.
Tassunga tunngatillugu Jess Svane erseqqissaavoq, kommunit kissaatigisimagunikku avissaaqqissallutik, taava suliniut kommunit namminneerlutik aallartittariaqaraat:
- Misilittagaqarpugut kommunit kattussuutsinneqarneranni Qaasuitsup Kommunerisimasaanit. Tassani innuttaasut kommunimilu qinikkat namminneerlutik erngertumik paasinikuuaat kommuni angivalaarujussuartoq. Kommunip innuttaasuni tusaaniarlugit avissaarnissamik sulissutiginninneq aallartinnikuuaa. Kommunit allat kissaateqarsimagunik kommunerisartik arlalinngorlugu avissaartinneqassasoq, taava kommuni nammineerluni suliniummik aallartitsissaaq, piareerunilu siunnersuummik Naalakkersuisunut apuussissaaq, Naalakkersuisuniillu inatsisitigut allanngortitassat Inatsisartunut ingerlateqqitassanngorlugit piareersarneqassapput.
Naammagisimaarinninneq pillugu misissuisoqalerpoq
Naalli massa kommunit namminneerlutik kissaateqarsimagunik avinnissaminnik suliamik aallartitsisussaagaluartut Naalakkersuisunullu Inatsisartunullu kissaatiminnik apuussisussaagaluartut, Naalakkersuisut iliuuseqarsinnaapput:
- Sinerissami innuttaasut naammagittaalliuteqartarnerat aammalu kommunit avinneqarnissaannik kommunitoqqallu uterteqqinneqarnissaannik piumasaqarlutik saqqummiussisarnerat piffissap ingerlanerani takkuttuartarpoq, tamannalu soorunami Naalakkersuisunit aammalu Inatsisartunit tusaasariaqarparput. Isumaqarpungalu pisussaaffeqartugut qisuariaateqassalluta, kommunit namminersortuunerat innarlinngikkaluarlugu. Tassanilu maanna sulissutigiligarput aqqutigalugu kommunit ikiorsinnaavagut innuttaasut naammagisimaarinnissusaat misissortillugu, suliniullu taanna Inatsisartuni ilaasortamit siunnersuut aallaavigalugu aallartisinnikuuarput (UKA2022/93).
Siunnersuummik saqqummiussisuuvoq Atassutip siulittaasua, Aqqalu Jerimiassen, taanna siunnersuuteqarami nalilersuisoqassasoq. Siunnersuulli taanna allanngortinneqarpoq IA-p allannguinissamik siunnersuutaa katersuuffiusorlu aallaavigalugu.
Tamatuma malitsigisaanik innuttaasut atukkatik pillugit isummaminnik anitsinissaminnut periarfissinneqartussanngorput naammagisimaarinninnermik misissuineq aqqutigalugu, taamaammallu kommunit innuttaasui 2024-ip ingerlanerani paasiniaaffigineqartussaapput qisuariarnissaminnullu periarfissinneqartussaapput. Jess Svane nassuiaavoq taanna isumasiuineq maanna piareersarneqaleruttortoq, piareerniariarpallu sukumiisumik misissuineq aallartinneqarumaartoq.
- Qanormi pisoqassava assersuutigiinnarlugu innuttaasut 60 procentii sinnerlugit isumaqarpata kommunit katitigaanerat naammaginanngitsoq?
- Misissuinermik taamaattumik aallartitsigutta, taava isumaqarpunga aamma inernera aallaavigalugu qisuariarnissatsinnut pisussaaffeqartugut, suliluunniilli misissuineq aallartinngitsoq siumoortumik aalajangersimasumillu qanoq qisuariartoqassanersoq innersuussisinnaanngilanga. Tassami uteqqillara, Naalakkersuisunit aammalu Inatsisartunit ataqqisassaraarput kommunit namminneq qanoq ingerlanissartik aammalu qanoq aaqqissugaanissartik pillugu aalajangiisinnaatitaapput namminersortuugamik. Qanorluuniilli ikkaluarpat, suna tamarmi imminut ataqatigiimmat, soorunami peqatigiilluta aaqqiissutaasinnaasut suleqatigiissutigisariaqarpagut, anguniarlugu innuttaasunut inuiaqatigiinnullu tamanut iluaqutissaasoq, Nunamut Namminermut Naalakkersuisoq Jess Svane Sermitsiaq.AG-mut oqarpoq.