Josef Motzfeldt Vestnordisk rådimi siulittaasunngorpoq
Nunat Avannarliit Killiit Siunnersuisooqatigiiffianni Kalaallit Nunaanni Inatsisartut siulittaasuat Siunnersuisooqatigiiffiup siulittaasuattut qinerpaat.
Siunnersuisooqatigiit ukiumoortumik ataatsimiinneranni aggustip 25-anit 28-anut Runavikimi aamma Tórshavnimi Savalimmiuni ingerlanneqartumi Josef Motzfeldt qinigaavoq. Siulittaasutut paarlappaa Kári P. Højgaard, Savalimmiuni Lagtingimi ilaasortaq.
Siulittaasunngornerminut atatillugu oqalugiarnermini Josef Motzfeldtip erseqqissarpaa nunat avannaarliit killiit siunnersuisoqatigiiffianni nunat ilaasortat pingasuusut, tamakkiisumik nunani avannarlerni suleqatigiinermi peqataanerat, kisianni nunat taakku nunani avannarlerni nunatut allatut inngitsut, tassami ataatsimoorlutik immikkut soqutisaqarnerat Nunani Avannarlerni allani soqutigisanut sanilliunneqaannarsinnaanngitsunik. Erseqqissarpaalumi tamannarpiaq pissutigalugu Nunat Avannarliit Killiit Siunnersuisooqatigiiffianni pilersinneqarsimasoq.
- Nunani avannarlerni killerni suleqtigiinnermi ataatsimoorluta soqutigisagut sulissutigalugillu illersortariaqarpagut, nunani ataasiakkaanni taamatullu nunat tamat suleqatigiiffiisa akornanni, ilaatigut nunani ataatsimut pissarititaasut, oqaluttuarisaaneq, kulturi, imartat kiisalu avatangiisit, kisianni tamakku navianartorsiortinneqarput, Josef Motzfeldt oqarpoq.
Aammattaaq erseqqissarpaa nunat soqutigisaat nunat tamalaat akornanni suleqatigiinnermut tunngatillugu siarsarniarneqartut, taamaattumillu neriorsuutigalugu ineriartornermi malinnaalluarniarluni, tamatigullu Siunnersuisooqatigiit Siulittaasoqarfia peqataatittarniarlugu nunat tamalaat akornanni suleqatigiinnissamut tulluarsarnissamut tunngatillugu, tamannami aqqutigalugu Siunnersuisooqatigiit nunat tamalaat akornanni oqaluuserineqartunut sunniuteqarsinnaalerniassammat.
Siunnersuisooqatigiit ukiumi ingerlatassaani ilinniartitaanermut suleqatigiinneq aamma annertuumik sammineqarniarpoq.
- Sapaatit akunneri pingasungajaat qaangiuttut Siunnersuisooqatigiit ilinniagaqarsimanngitsut ilinniarnissamut periarfissaat pillugit Kalaallit Nunaanni isumasioqatigiinneq ingerlappaat, sammisaq nunanut ilaasortaasunut assorsuaq pingaaruteqartoq. Maannangaaq suliniutit suleqatigiissutaasinnaasut piviusut pillugit eqqarsartoqalereerpoq kiisalu uagut qulakkeerinneqataassaagut tamatuma piviusunngortinneqarnissaanut, Josef Motzfeldt oqarpoq.
Josef Motzfeldt Kalaallit Nunaanni Inatsisartunut Inuit Ataqatigiit sinnerlugit qinigaavoq kiisalu kalaallit Nunat Avannarliit Killiit Siunnersuisooqatigiiffiannut aallaartitaannut siulittaasuulluni, siusinnerusukkullu arlalippassuariarluni Nunat Avannarliit Killiit Siunnersuisooqatigiiffianni ilaasortaasarsimavoq.
Josef Motzfeldtip saniatigut Siulittaasoqarfimmi ilaasortaaqataapput siulittaasup tullia siulleq Ólína Þorvarðardóttir Islandimi Altingimi ilaasortaasoq aamma Kári P. Højgaard, Savalimmiuni Lagtingimi ilaasortaasoq.
Nunat Avannarliit Killiit Siunnersuisooqatigiiffiat Savalimmiuni Lagtingip, Kalaallit Nunaanni Inatsisartut aamma Islandimi Altingip suleqatigiiffigaat.