Julianep ulloq suliffia siulleq
Kalaallit Nunaata politikeria inuusuttoq Juliane Henningsen Folketing-imi ilaasortatut nutaatut marlunngorpat sulileruni kalaallisoorluni sulilissaaq.
Folketing-i marlunngorpat ammarpat Juliane Henningsen, IA, Folketingimi ilaasortat nutaat akornaniissaaq.
Juliane ilaasortanut nutaanut pikkorissarnerit tallimanngormalli ingerlappai. Pikkorissarnermi tassani Christiansborgimi ulluinnarni suleriaatsit ilinniarpai, knr.gl allappoq.
- Qujanarpoq illorsuaq ilinniarfigigatsigut. Ullumi sulineq aallartikkutsigu kalaallisoorlunga suliartussaanga, ajamma aamma ullormi sulileqqaarninni ilaginiarpaanga. Taanna assut tulluusimaarpoq, Juliane Henningsen oqaluttuarpoq.
Statsminister Anders Fogh Rasmussen qallunaat nalunaaqutaat malillugu nalunaaqutaq 13 ammaanersiorluni oqalugiassaaq.
Juliane Henningsen sisamanngorpat pernaammik oqalugiassaaq.
- Taamanikkussamut statsministerip oqalugiaataa aallaavigalugu ammaanersiorluni oqallinneqartussaavoq. Piareersimassaqqaarpunga, Juliane oqaluttuarpoq.
Kalaallit Nunaata Folketing-imi ilaasortaatitaata aappaa qinigaaqqittoq Lars-Emil Johansen suli Nuummiippoq, aatsaallu borgmester Agnethe Davidseniugaluup ilisaareernerata kingorna folketingimut ataatsimiigiassalluni, knr.gl ilisimatitsivoq.