Juntaaq kannguttaatsuliorsimasutut pisuunerarneqarpoq
Taamanikkut Inatsisartut siulittaasuat Jonathan Motzfeldt aammattaq Inerisaaviup pisortaa Jens Jakobsen, nassuersimapput angerlarsimaffimmi katerisimaarnermi arnaq angutaaserfigisimallugu. Taamaattoqaraluartoq politiit isumaqanngillat suliap qaqeqqinnissaanut tunngavissaqarlutik.
Taamatut allaaserisaqarpoq Politiken søndag.
Pisoq 2007-mi aallartippoq. Anja Hynne Nielsen, taamanikkut namminersornerusuni atorfeqartoq, isumasioqatigiisitsinerup kingorna inuit marluk allat ilagalugit taamani Inatsisartut siulittaasorisaata Jonathan Motzfeldtip atorfimminut atatillugu angerlarsimaffianut qaaqqusaapput. Nalunaaquttap akunnialui qaangiuttut Politiken malillugu arnaq Nuummi aqquserngit ilaanni nikorfalluni misigilerpoq Motzfeldtip qarlii atorlugit ikiaquteqaranilu - misigisimalluinnarporlu kinguaassiutimigut atornerlunneqarsimalluni.
Angutit taakku marluk pinngitsuutinneqarpoq ilaatigut siorna RIgspolitiit pisimasumik misissuereernerisa kingorna. Oqartussaasunit inerniliineq tassaavoq uppernarsaatissat naammattut pigineqanngitsut.
Tamatuma kingorna Politikenimi pisimasumi immikkoortut nutaat saqqummiunneqarput. Aviisi malillugu Jonathan Motzfeldtip aamma Jens Jakobsenip arnaq utoqqatserfigisimavaat oqaatigisimallugulu, pisimasoq pillugu ilerasuuteqarlutik, taamatuttaarlu Anja Hynne Nielsenimut qanoq pisoqarsimanera nipangiuteqqusimallugu.
Aviisi malillugu Anja Hynne Nielsen, Motzfeldtimit oqaloqatiginninnerminik diktafonimut immiussaateqarpoq, tassani iliuuseqarsimanini pillugu utoqqatserpoq. Ilaatigut tamanna imatut oqaatigaa "unnuk assut qinngarnartoq" kiisalu nangilluni "paamisaarsimagukkit tamanna assorsuaq ajuusaarutigaara".
Politikenimi allaaserisaq nangippoq, Jens Jakobsen arlalinnut tunngatillugu miserratiginnittareerluni politiinut nassuersimasoq unnuaq taanna Anja Hynne Nielsen atoqatigalugu ilagisimallugu. Tamatumunngalu atatillugu nassuiaasimalluni, nammineq isumaqarluni tamanna pinngitsaaliinertaqanngitsumik pisimasoq.
Anja Hynne Nielsenip tamatuma saniatigut Jonathan Motzfeldt pisuutippaa imminut nakuusersimanerarlugu kiisalu katerisimaarnermi attualaarinnissimanerarlugu aammattaaq Jens Jakobsenip katerisimaareernerup kingorna taxartillutik attuualaarisimanerarlugu pisuutillugu.
Aviisi malillugu Politimestereqarfimmi politimesterip Steen Silberg Thomsenip oqaatigaa pisumut tunngatillugu politiit iliuuseqaqqissinnaanngitsut.
- Piviusut tunngavigalugit uppernarsaatissaqanngilaq, atorneqarsinnaasunik nassaartoqanngilaq, Politikenimut oqarpoq naqissuserlugulu angutit taakku marluk sallusimanerat aamma arnamik oqarasuaatikkut oqaloqatiginninnerminni ilerasuuteqarnerminnik oqarsimanerat allanngortitsinngitsoq.
Jonathan Motzfeldt aamma Jens Jakobsen pisimasoq pillugu Politikenimut oqaaseqarusussimanngillat.