Justus Hansen marlunnik toqutsisoqareersoq Naalakkersuisunut iliuuseqaqqusisoq
Justus Hansen Tunumi sapaatip-akunnerata ataatsip ingerlanerani marlunnik toqutsisoqareersoq iliuuseqaqqusivoq. Naalakkersuisut tunumi inuuniarnermi atukkat pitsanngorsaaffiginiarlugit iliuuseqartariaqarput. Toqutsinermi nunap immikkoortuani ajornartorsiutinut suli atugaasunut takussutissaavoq.
2022-mi Sapaatip akunnera siulleq suliluunniit naanngilarput, Nunatta Kangiani toqusut marluk nalaanneqareerput, toqutsisoqarsimaneranillu pasitsaassinermik suliarineqarlutik. Tamatuma malitsigisaanik Kommuneqarfik Semersuumi ilaasortaq Justus Hansen (D) nikussaarpoq.
- Tamanna alianarluinnarpoq. Ingammik qanigisaasunut kisiannili aamma Nunatta Kangianeersuusunut tamanut, pisut sakkortuut takutitsimmata pissutsit qanimut iluarsisariaqakkat kinguussaaqqanerinik. Uani immikkut taaneqarsinnaavoq ineqarnikkut inissisimaneq taama isikkoqartillugu illoqatigiiaat inissakilliortinneqarneri.
Siorna nunami tamarmi katillugit pingasunik toqutsisoqarpoq, 2020-mi nunami tamarik tallimanik toqutsisoqarsimalluni. 2022-milu kisitsisit ajorluinnartumik aallartipput.
Pitsaanerulersitsisoqarsimavoq - naammanngillalli
Justus Hansenip pitsaasutut pisimasut qiviarlugit oqaatigaa, Kommuneqarfik Sermersooq pitsaasumik ingerlatsisoq, kommuunerujussuanngornerlu pitsaasumik
malitseqarsimanera takussutissaqartoq. Aamma Tunumi ajornartorsiutit, tv-kkut piviusulersaarut ´Byen hvor børn forsvinder´ takutinneqareersoq, ukkatarineqarnerulersimanerat oqaatigaa.
- Kisiannili suliniutit pitsaasut soorlulusooq Namminersorlutik Oqartussat illorsuaanni unittoortartut. Maqaasivaralu Naalakkersuisut tungaanniit ajornartorsiutit unammilligassallu pimoorullugit tiguneqarnissaat.
Demokraatineersormi isumaqarpoq suliassaqaqisoq. Meeqqat suminnarneqartarnerat, imigassaq, hashi, suliffissaaleqineq inissaaleqinerlu ajornartorsiutit ajornerpaat ilagigaat, taassuma erseqqissaassutigaa.
- Maqqasisanni annerit ilagaat Naalakkersuisut akuersaarlugu tigussagaat inissaaleqinerujussuarput, kommunelu suleqatigalugu ajornartorsiummut aaqqiiniarnissaat. Ini toqqissisimaffik pitsaasorlu Nunatta Kangiani ajornartorsiutinik qaangiiniarnissatsinnut aallarniutit pitsassuit ilagissavaat.
Aporfeqartarneq
Ineqarniarnikkullu ajornartorsiut ajornartorsiutini kisiartaanngilaq.
- Uagna politikkereqatigullu Nunatta Kangianeersut ukiorpassuarni pissutsit maani atuuttut sorsuutigisimaqaagut, kisiannili soorlu iigarsuarmut aportarluni. Siunnersuuteqarsimagaangatta peqqutit allarpassuit uniffiusarsimapput, ilorraap
tungaanukarfigisimasinnaagaluagut.
Justus Hansenip tupigusuutiginerarpaa, Tasiilami timmisartoqarfiliortoqarnissaanik imaluunniit ilinniartoqarfimmik pilersitsisoqarnissaanik politikkerit isumaqatigiissinnaannginnerat.
- Efterskoleusinnaavoq, takornariartitsinermik ilinniarfiusinnaavoq imaluunniit allarluinnaasinnaalluni. Ilinniarfissanik pilersitsisoqartuuppat Tunumi ilinniarsimassutsimut qaffassaataasinnaavoq.
Justus Hansenip oqaatigaa, Naalakkersuisut Tunumi inuuniarnikkut atugarineqartut maannamut sanilliullugu pimoorunnerullugit iliuuseqarfigisariaqaraat.
- Oqariartuutima annersaat tassaavoq, Naalakkersuisut Nunatta Kangiani maannamut inissisimaffitta qaangerniarnissaanut iliuuseqarnerusariaqalerput. Inuit tujormissuteqarput, malugaarput. Meeqqanut sunniuteqarpoq, aliasunnerillu imigassamik ikiaroornartumillu matoorneqarput.