Justusip ikinngutigiinnermut isumaqatigiissut oqaluuseritinniarpaa: Tamatta imerajuttutut saqqummiunneqarpugut?
Tasiilap Gentoftemut illoqarfittut ikinngutigiinnermut isumaqatigiissut politikerip Justus Hansenip isumaqatiginninniutigeqqinneqarnissaa kissaatigaa. Illoqarfiit taakku marluk akornanni ataqqeqatigiillunilu naligiittoqartariaqartoq, taanna isumaqarpoq.
DR-imi aallakaatitassiap "Byen, hvor børn forsvinder"-ip aallakaatinneqarnerata kingorna, kommunimi atuartut Tasiilamut tikeraaraangata angerlarsimaffinni unnuisassanngitsut, Gentofte Kommunip 2019-imi aalajangiuppaa.
- Ilisimasat pissarsiarisavut malillugit, tamanna illersorsinnaanngilarput, taamanikkut kommunimi pisortaq, Torben Frølich, Radio24syv-imut taama oqarpoq. Aallakaatitassiami piviusulersaarusiami inuuniarnikkut ajornartorsiutit kannguttaatsuliornerillu pillugit paasissutissanut, pisortaq innersuussivoq.
Gentofte aamma Tasiilaq ukiorpassuarni illoqarfittut ikinngutigiipput, tassungalu atatillugu atuartut paarlaasseqatigiittarput.
Meeqqat timersortarfimmut inissinneqartartut
Suliaq maanna Kommuneqarfik Sermersuumi kommunalbestyrelsip ataatsimiinnerani saqqummeqqippoq.
Politikeri Justus Hansen (D) Tasiilami najugaqarpoq, taassumalu Tasiilap aamma Gentoftep illoqarfittut ikinngutigiinnerat pillugu isumaqatigiissutip kommunalbestyrelsimit oqaloqatigineqarnissaa siunnersuutigaa.
Maanna pissutsit naligiisitsinermik takutitsinngitsut, taanna isumaqarpoq:
- Tasiilaq aamma Gentofte ukiorpassuarni 6. klassimi atuartunik paarlaaqatigiilluni angalasarnermik isumaqatigiissuteqarpoq. DR-imi aallakaatitassiap ”Byen hvor børn forsvinder”-ip aallakaatinneqarnerata kingorna, meeqqat qallunaat Tasiilamut tikikkaangamik Minihallenimut inissinneqartassasut Gentoftemi aalajangerneqarpoq, kalaallillu meeqqat Gentoftemut tikikkaangamik angajoqqaarsiaqartassasut.
Isumaqatigiissut isumaqatiginninniutigeqqinniaraat
- Gentoftemi ilaqutariinnit kommunimiillu meeqqanik atornerluisartutut imerajuttutullu saqqummiunneqartarnerluta kusananngitsumik takorloorpara, Justus Hansen, suliap oqaluuserinissaanut tunngavilersuutimini allappoq.
Politikerip isumaqatigiissut isumaqatiginninniutigeqqikkusuppaa:
- Isumaqatigiissutit taakku isumaqatiginninniutigeqqinneqassapput, illoqarfiit taakku tamarmik pitsaanerpaamik pissarsiaqarlutillu ataqqeqatigiinnermik aamma assigiinngisitsisoqarnani imminnut ilisarisimaqatigiilerniassammata, Justus Hansen allappoq.
Tasiilami inuuniarnikkut ajornartorsiutit ilaatigut DR-imi aallakaatitassiami qulaajarneqartut qiviaraanni, Gentoftep nangaassuteqarnera paasisinnaaneraa, Sermitsiaq.AG-p politikeri apeqquteqarfigaa.
Justus Hansenip tassunga atatillugu illoqarfiit ikinngutigiinnerannut isumaqatigiissut, illoqarfiit akornanni naligiinnermik ataqqeqatigiinnermillu takutitsinissaa kissaatiginerarpaa. Ilanngullugu oqaatigaa, nammineq meeqqaminik Gentoftemiititaqarnikuulluni, ernumassuteqarnerlu aamma illuanit atuunnerarpaa:
- Danmarkimi meeqqanik atornerluisartoqarnera pillugu aamma uanga ernumassuteqarpunga, Justus Hansen oqarpoq.
Assersuutigalugu meeqqat qanoq amerlatigisut angajoqqaarsianut inissinneqartarnersut naapertorlugit, Tasiilami inuuniarnikkut unammilligassat suli malunnartorujussuupput. Kommuneqarfik Sermersuumit kisitsisit kingulliit naapertorlugit, meeqqat 68-t Tasiilamit nunaqarfiiniillu angajoqqaarsianut inissinneqarsimapput.
Nuummi eqqaanilu meeqqat inuusuttullu 76-it angajoqqaarsianut inissinneqarsimapput. Kisitsisillu imminnut ungasinngillat, kisianni Nuummi innuttaasut Tasiilamit quleriaatingajammik amerlanerupput.