KAIR-imi sinneqartoorutaasinnaasut pillugit Namminersorlutik Oqartussat Danmarkimut isumaqatiginninniuteqarput

Mittarfiliortiternerit aningaasalersorneqartussanngormata danskit naalagaaffiat aningaasanik tapiissuteqarpoq, taamaattumillu naalagaaffik Kalaallit Airports Internationalimik piginneqataavoq.

KAIR Internationalip Nuummi Ilulissanilu mittarfissuit nutaat aamma sanallugillu pigissavai.

Naalagaaffik KAIR Internationalimi pingajorarterutaanik piginnittuunermini ingerlatseqatigiiffimmi malunnaatilimmik sunniuteqarpoq, soorunalimi aamma piginneqataanermini siunissami sinneqartooruteqarnissamik naatsorsuutigisanik pissarsiaqartussaavoq.

Sinneqartoorutissat taakku pillugit Naalakkersuisut maanna naalagaaffimmut isumaqatiginninniuteqarput. 2024-mut aningaasanut inatsisissatut siunnersuummi saqqummiunneqaqqammersumi tamanna takuneqarsinnaavoq.

Danmarkimut saaffiginnittut

KAIR Internationalip nunatsinni mittarfeqarfiit sinneqartooruteqarfituaasunik piginnittussaanerannik ajornartorsiummik isumaqatiginninniarnerit aaqqeeqataassapput, taamaattoqarnerani Mittarfeqarfiit mittarfiit sinnerannik qulimiguulinnullu mittarfinnik ingerlatsisussanut millioninik akiligassaqalersitsissammata.

Mittarfeqarfiit ukioq manna Kalaallit Airportsimit aningaasaliiffigineqarput, kisianni Kalaallit Airport Internationalilu ”ataatsimut aningaasaqanngillat” (suliffeqarfiup aaqqissugaanera ataani takuuk).

Naalakkersuisut aningaasanut inatsisissatut siunnersuummi allapput:

”Danskit naalagaaffiat suleqatigalugu Kalaallit Airports-imi siunissami aningaasaqarnissaq pillugu suliaq maanna aallartinneqarpoq, tassami Naalakkersuisut Kalaallit Airports Intl. A/S-ip nuna tamakkerlugu mittarfimmik ingerlatsineranut iluanaarutai annertusarneqarnissaannik periarfissiornissaq kissaatigimmagu.”

Isumaqatiginninniarnerit pillugit Sermitsiaq.AG Naalakkersuisut siulittaasuannit Múte B. Egedemit (IA) aamma attaveqaasersuutinut naalakkersuisumit Erik Jensenimit (S) oqaaseqartitsiniaraluarpoq. Tamanna suli iluatsinngilaq, kisianni suliaq sinneqartoorutit atorneqarnissaannut tunngasuusoq, Namminersorlutik Oqartussani atorfilittaq uppernarsaavoq, aamma Namminersorlutik Oqartussat tamanna pillugu danskit naalagaaffiannut saaffiginnissimasut.

100 mio. kr.-t Mittarfeqarfinni amigartoorutinut matussutaassapput

Aningaasanut inatsisissatut siunnersuummi nunap immikkoortuini mittarfinni amigartoorutit siornatigut Kangerlussuarmi, Nuummi aamma Ilulissani mittarfinnit matuneqartartut nassuiarneqarpoq, mittarfiit tamarmik Mittarfeqarfinni manna tikillugu katersuussimammata.

KAIR Internationalilimi Nuummi Ilulissanilu mittarfinnit iluanaarutaasussat sanaartornermut taarsigassarsiat akilersorneqarnerinut atorneqassapput, kiisalu mittarfissuit nutaat ingerlanneqarnerannut isumannaallisarneqarnerannut atorneqassallutik.

Taamaammat nunap immikkoortuini mittarfinni amigartoorutit matussuserneqarnissaannut 2025-mit aningaasaliisoqarnissaa pisariaqarpoq. Naalakkersuisut ukiuni 2025, 2026 aamma 2027-mi tamani 100 mio. kr.-inik immikkoortitsisoqarnissaa siunnersuuteqarput.

Nutarterinermi kingulerunneq isumagineqassasoq

Naalakkersuisut oqarnerat naapertorlugit taakku aningaasartuutit ataatsimut isigalugu mittarfinnik suliniuteqarnermi inuiaqatigiit aningaasaqarnerannut pitsaasumik sunniuteqassapput. Naalakkersuisullu nunap immikkoortuini mittarfeqarfinni nutarterinermi kingulerunneq 100 mio. kr.-nit isumagineqarsinnaassasut naatsorsuutigaat.

Aningaasanut inatsisissatut siunnersuummi mittarfiit nutaat malitsigisaannik Kalaallit Nunaannut tassungalu angalanermi unammilleqatigiinnikkut aningaasaqarnikkut periarfissaqartoq naatsorsuutigineqartoq naqissuserneqarpoq.

- Mittarfinnut akitsuutit toqqaannartumik kingunerisaannik, kisiannili aamma toqqaanngitsumik kingunerisaannik, aammalu takornariaqarnerulernerup kingunerisaanik inuiaqatigiinni sunniutaalluartut suliaqarnerillu kingunerisaannik, Naalakkersuisut aningaasanut inatsisissatut siunnersuummi allapput.