Nuummi parnaarussivissaq
Kajumissaarut: Parnaarussivik 500 meterinik illuartilli
Nuummi parnaarussivissap Nuummi isikkiviginnerpaat ilaannut inissiffissaa pillugu akerliusut amerliartorput
Arpattartup Kim Godtfredsenip Nuummi innuttaasut kajumissaarpai ataasinngorpat juulip 1-ani nalunaaqutaq 14.00 savimikoorfiup isaariaanut orniguteqqullugit. Ornigunnermi siunertaavoq parnaarussivissap inissisimavissaata 500 meterinik nuunnissaa taamaalilluni Nuummi innuttaasorpassuit sunngiffinnimmi aqqutinnaavat asserneqarani.
Marlunngormat arpatsilluni Kim Godtfredsenip paasivaa parnaarussivup sumerpiaq inissisimanissaa paasigamiullu facebookimi quppernermini allalluni. Tassani allappoq:
- Ullumi Kuanninnguanut nuannersunut ikinngutitoqarsuara Morten Jørgen Heilmann peqatigalugu nuannersumik arpaqatigaara. Aqqutaani parnaarussivissap sumerpiaq inissisimanissaa takutippaa. Uppingajappunga! Kuanninnguanut pinngortitamullu aallartiffiani aminnersaanilu aqqummiissaaq. Sumi inissisimanissaanik aalajangiisut nammineq ornigullutik inissisimaffissaa NALILERSOQQITTARIAQARPAAT. Atuisuusugut siunissamilu atuisussat siunissami Kuanninnguanut Quassussuullu tunuanut arpattartugut pisuttuartartugullu sissakkoortalissaagut imaluunniit parnaarussiviup tunuatigut qaarsukkoorluta!
Nunarsuarmi qeqertat annersaat
Tupinnanngitsumik Kim Godtfredsenip facebookimini allassimasaa aalassatsitsivoq. Maannakkut 141-t ”iluaralugu” toorsisimapput, allassimasaa 84-eriarluni allanit agguaanneqarsimalluni oqaaseqarfigineqarluarlunilu.
Oqaaseqaatit ilaani Kim Godtfredsenip erseqqissarpaa parnaarussiviup pilersinnissaa akerlerinngikkini sumiiffissaatali allanngortinnissaa kissaatigigini. Aamma facebookimi ima allappoq:
- Arraa, nunarsuarmi qeqertat annersaanni najugaqarpugut, imaassinnaanngilarlu illupiluunersuaq ilumut tassanerpiaq inissinneqartariaqartoq! 500 meterinik qummut ammulluunniit nuussiuk!
Kim Godtfredsenip naalakkersuinermik suliallit aamma aaqqissuussinermut ornigunnissaannik kajumissaarpai, taamaalillutik nammineq isiminnik takullu nunaminertaq qanoq isorartutigisoq. Sermitsiaq.AG-mi oqaaseqarpoq:
- Saviminikorfiup isaariaani naapikkutta tungaanut 900 meterinik pisussaagut. Tassaniippoq tupersualiara pinngortitarsuarlu naalaarlugu minutsimi ataatsimi nipaallisimassalluta. Taava takussavarput nunaminertaq qanoq isorartutigisoq eqqarsaatigalugulu sooq atorfilittat parnaarussivik tassanerpiaq inississimaneraat. Takuneqarlunilu tusaaneqartariaqarpoq. Minutsini pingasuni oqalugiartoqassaaq, naalakkersuinermillu suliaqartoq isummaminik anitserusukkuni tamanna ilorraap tunngaanut alloriarnerussasoq annertooq neriussaagut, Kim Godtfredsen oqarpoq.
Parnaarussivik 2017-mi naammassissaaq illoqarfimmilu isikkiviginnersaagunarluni. Sumiinnissaa pillugu nutaarsiassaaq aamma maani Sermitsiaq.AG-mi oqallisaaqaaq.
Qanoq isumaqarpit? Parnaarussivik 500 meterinik illuartinneqassava?