Kalaaleq nukappiaraq 15-inik ukiulik toqutsisutut paasineqartoq
Ataqatigiissaartumik ataavartumillu politiit sulinerisigut 85-inik ukiullip Gerda Møllerip toqutsisua paasineqarpoq, skuuisa alui pissutigalugit
– Suliassaq ingerlassimasarput sivisusimaqaaq oqimaassimaqalunilu ajornakusoortorujussuusimallunilu, taamaattumik tulluusimaarutigisorujussuuvar toqutsisoq nassaarigatsigu, Jyllandip avannaani Politiini vicepolitiinspektør Frank Olsen ekstrabladet.dk-mut oqarpoq, Gerda Møllerimik, ukioq manna majip 26-ianni angerlarsimaffimmini soqqusaatsumik pinngitsaalineqarlunilu savimmik kapoorneqarluni toqutaasumik suliassaq pillugu.
Nukappiaraq ippassaq qulit missaannik Qaqortumi angerlarsimaffiani tigusarineqarpoq. Qaammatini sisamani politiit soqqusaatsumik pinerlunneq paasiniarsimavaat, skuullu arpaasit Adidas pissutigalugit suliassaq paasineqarpoq.
- Toqutsisoq inissiami ammut tutisimavoq tumimi naqinnera qimalugu. Paasivarput skuunit Adidas-ineersoq, taamaattumik aaqqissuussaasumik suliniuteqarsimavugut. Paasivarput skuut tamakkua Danmarkimi pisiniarfinni 1000-it tunineqarsimasut, sapaatip akunnerisa pingajuanniit upernaap ingerlangaatsiareernerata tungaanut. Skuut 57-erpiaat aammi tumip angissusaatut angitigisut tamaani Bilkami tunineqarsimapput, taavalu Bilka suleqatigalugu tunisat tamaasa misissorpavut.
Nukappiaraq taamanikkut Jyllandip avannaani paaqqinniffimmi najugaqarsimavoq. Aalborgimi majip 26-ianni karnevaleriarsimavoq, Frank Olsenilu malillugu unnuami toqutsiffimmi angalaarsimanini nassuiarsinnaasimanngilaa.
- Qularutiginngilarput kisimiillu taamaasiorsimasoq, kisimiillunilu toqutsisimasoq.
15-inik ukiulik ippassaq Kalaallit Nunaanni matoqqasumik inatsisit tunngaviusut malillugit killisiorneqarpoq, tassanilu arnamik utoqqarmik toqutsisimanini pinngitsaaliisimaninilu nassuerutigai. Maanna oktoberip 4-aata tuangaanut tigummigallarneqarpoq, Aalborgimullu aallarunneqarumaarluni, taamatut Ekstrabladet allappoq.