Kalaaleq pinngitsaalineqarsorisoq
Vejlemi inissiami arfininngormat unnukkut kamaanneq sakkortusaarninnguuppoq, angut inuusuttoq niaqqumigut 8 centimeterisut takitigisumik 2 centimeterisullu ititigisumik kilerneqarmat.
Kalaaleq arnaq isumaqarsimavoq Vejlemi inissiami pinngitsaalineqarluni atoqatigineqarluni, taamaattumik ikiortissarsiorpoq. Ikiuiniartut ilaat ataaseq savimmik niaqqumigut kapineqarpoq, Ritzau allappoq.
Kalaaleq arnaq 19-inik ukiulik saaffiginnissimavoq, oqaluttuarlunilu inissiami Læget Højimi isersimasunit pinngitsaalineqarluni atoqatigineqarsimalluni, taamaattumik angut taanna ikilerneqartoq ikinngutini ilagalugit inissiamukarsimavoq.
- Arnaq assut imigassartoreersimalluni itersimavoq, isumaqarlunilu pinngitsaalineqarluni atoqatigineqarsimalluni. Taamaattumik inissiami qanittumiittumut ilisarisimanngisaminut arpalluni ikiortissarsiorluni ornigussimavoq, vicepolitikommissær Peter Krogh Sydøstjyllands Politineersoq oqarpoq.
Politiit oqarnerat naapertorlugu angutit arnap inissiami ikiortissarsiorfigisaasa arnap oqaluttuarisaa kamaammissutigisimavaat taamalu inissiamut arnap pinngitsaalineqarsoriffigisaanut ornigussimallutik. Kamaattoqalerpoq, taamalu baseball-imut anaalerummik anaalerisoqareersorlu "ikiuiartortut" ilaat kassimigut ikilerneqarpoq.
Politiit pisoqarfiusumut ornigullutik siullermik angut 25-nik ukiulik Løget Højimi inissiameersut ilaat tigusaraat, kisianni taanna killisiorneqareerluni iperagaavoq. Taarsiullugu politiit maanna angut savimmik kapisisuuneragaasoq kinaassusersiniarpaat.
Arnaq misissorneqareerpoq, kisianni inissiami artuleqqatillugu pinngitsaalillugu atoqatigineqarsimasinnaaneranik malunnartoqanngilaq.