Kalaaliaqqami nerisassat suli amerlanerusut
Astrid Fleischer Rexip paaserusuppaa Kalaaliaqqami kalaallit nerisassaataannik suliareriikkanik sooq nioqquteqartoqarsinnaannginnersoq
Sapaatit akunneranni kingullermi Nuuk Ugeavisip illoqarfiit pingaarnersaanni kalaalimineerniarfittaaq allaaserimmagu, tassani kalaalimineerniat pisisartullu naammagittaalliornerat pineqarluni, Inatsisartunut Demokraatit sinnerlugit ilaasortaq, Astrid Fleischer Rex, apeqquteqarpoq sooq kalaalimineerniarfinni kalaallit nerisassaataannik suliareriikkanik nioqquteqartoqarsinnaannginnersoq.
Tassunga atatillugu apeqqutigaa Naalakkersuisut pilersaaruteqarnersut inatsimmik allanngortitsinissamut, taamaalilluni kalaallit nerisassaataannik suliareriikkanik kalaalimineerniarfinni nioqquteqartoqarsinnaalersillugu. Aamma paaserusuppaa Naalakkersuisut inuussutissanik nakkutilliinerup Naalakkersuisunit akisussaaffigineqalernissaanut suliaq sumut killinnersoq.
Taamatut apeqquteqarnerminut tunngavigaa Nuup illoqarfiata qeqqani kalaalimineerniarfimmik nutaamik ammaasoqarneratigut amerlanerit kalaallit nerisassaataannik suli annertunerusumik nerisaqartalernissaat naatsorsuutigineqarmat.
- Ammarneraniit piffissaq sivikitsuinnaq qaangiuttorlu paasinarsivoq kalaalimineerniarfimmi arlalinnik ajornartorsiuteqartoq, erseqqissaavoq.
- Atuisartorpassuit aamma piniartut aalisartullu naammagittaalliutigaat kalaallit nerisassaataannik suliareriikkanik kalaalimineerniarfinni nioqquteqartoqarsinnaannginnera, soorlu aalisakkanik panertunik, puisit, arferit aamma tuttut nikkuinik, paarnanik, kuanninik aamma pujuukkanik, oqarpoq Naalakkersuisooqatigiinnermullu isumaqatigiissut innersuussutigalugu, tassani allassimammat:
”Naalakkersuisut pingaartippaat Nunatta imminut annertunerusumik pilersulersinnaaneranut periarfissat misissorneqarlutillu inerisarneqarnissaat...”,
aamma
”Inuussutissanik nakkutilliineq danskit naalagaaffianniit nuunneqartussat siulliit ilagissavaat.”
og
”Kommunini tamani inuussutissanik nakkutilliineq pitsanngorsarneqassaaq inatsisillu Nunatsinnut naleqqussarneqarlutik”.
Astrid Fleischer Rex isumaqarpoq pingaartuusoq kikkut tamarmik kalaallit nerisassaataannik mamarsartarnissaat.
- Tamatuma inerisartuarneqarnissaa pitsanngorsarneqarnissaalu iluaqutaassaaq, oqarpoq.