Kalaallisut pikkorinnerulerpugut
Tusagassiortup Noah Mølgaardip atorfininneratigut Sermitsiaq.AGp aaqqissuisoqarfiani allaaserisat kalaallisut suliarineqartarnerat nukittorsarneqassaaq
KNRip nittartagaani aaqqissuisoqarfimmi sulereerluni 46-nik ukiulik Noah Mølgaard tusagassiuteqarfimmi Mediehuset Sermitsiaq.AG-mi suleqqilerpoq.
Pingaarnertut suliarisussanngorpaa allaaserisat tamalaat nittartakkamut suliarinissaat timersorneq ilaatigut ilanngutassiuiffigisassallugu.
Tusagassiortup misilittagaqarluartup atorfininneratigut nittartakkami allaaserisat kalaallisut allanneqartarnerat nukittorsarparput allannguutissallu allat aamma piareersarneqarput.
Noah Mølgaard iluliarmiuuuvoq 1991-milu tusagassiortutut naammassilluni. 2007-mi nittartakkami tusagassiuinermi diblomimik taaneqartartumi Aarhusimi naammassivoq.
Noah timersornermik soqutigisaqartutoqaavoq sunngiffiminilu aamma nipilersortarluni periarfissaqartilluni Kalak Jazz Ilulissaneersoq nipilersoqataaffigisarlugu.
1997-miit 2010p tungaanut Sermitsiami sulivoq.