Kalaallisuuliornermik ilinniaqatigiit siulliit
Sisimiuni ilinniagassaq ilusilersuinermik ilinniarfissap ataanniissaaq
Tallimanngornermi decembarip 16-ianni Arnat Ilinniarfianni Sisimiuniittumi kalaallisuuliornermik ilinniartut siulliit naammassissapput. Kultureqarnermut naalakkersuisoq Mimi Karlsen ilinniartitaanermut naalakkersuisoq Palle Christiasen allagartartaarnermi, Kulturikkut illorsuarmi Taseralimmi pisoq malunnartinniarlugu peqataassapput, Namminersorlutik oqartussat tusagassiivinnut allapput.
- Kalaallisuuliornermik ilinniartut februaarip aallaqqaataanni 15-niullutik 2010-mi aallartipput, massakkullu taakkunanit 7-it naammassillutik allagartartaassapput. Ilinniagaqarneq ukiuni marlunni misiliutitut ingerlanneqarpoq, Naalakkersuisulli aalajangerput kalaallisuuliornermik ilinniarfik ingerlaannarallassasoq Designskolissap ataanni.
- Ulloq Kultureqarnermut Naalakkersuisumut Mimi Karlsenimut qilanaarnaqaaq tulluussimaarlunilu, taassumami kalaallisuuliornermik ilinniarfiup aallartisarnera sulissutigisimagamiuk, kulturikkut eriagisassat ilaat, suliallu kusanartup ataqqisami puigutsaalineqarnissaa tammannginnissaalu pingaartikkamiuk, isumaqaramilu piffissaq kingulleq atorneqartoq tammatsaaliuinissamut..
Palle Christiansen tulluussimaarpoq
- Ilinniartitaanermi Naalakkersuisoq Palle Christiansentulluussimaarpoq ilinniartut pimoorussillutik sulisimasut naammassilermata, nuannaarutigaalu kalaallisuuliornermik ilinniarusuttut tullii februarip aallaqqaataanniit qinnuteqarnikut oqaloqatigineqalissammata. Oqaloqatiginissaat pingaaruteqarpoq ilinniarnerminni aporfigisinnaasut pinaveersaartinniarlugit uninnartoqannginnissaanullu sapinngisamik piareersimalluarnissaat kissaatigineqarmat.
- Naalakkersuisut nuannaarutigaat Arnat ilinniarfianni sulisut sulilluarsimammata, ilaatigut ilinniagaqarnerup siullermeerneqarnermini misiliutaanerminilu aqqutissiuinerummat. Massakkulli ilinniartullu kivitseqataapput kalaallisuuliornerup tammatsaalinissaanut.
- Naalakkersuisut isumaqarput siunertartik inuusuttut kalaallisuuliornermut soqutiginninnerulernissaat angujartorlugu ilinniartummi suliaminnut pikkorilluinnarsimagamik, naak ilai inuusukkaluaqalutik.