Kalaallit Airports: Danmarkip itigartitsisinnaaffii amerlapput

Ilulissani Nuummilu mittarfiit pillugit Danmark aningaasaleeqataagami, taamatullu 33,3 procentimik piginneqataalerami annertungaatsiartumik pissaaneqalerpoq. Sermeitsiaq.AG ippassarli taama allaaserisaqarpoq. Inatsisartunili aningaasaqarnermut ataatsimiititaliap pingajussaaneerluni isumaliutissiissutimini maanna allaganngorlugu uppernarsarpaa naalagaaffik qanoq ilinikkut itigartitsisinnaassanersoq. Naalakkersuisut siulittaasuat, Kim Kielsen (S) arlaleriarluni isumasioqatigineqartareersimavoq, taakkunanilu piginneqatigiissutip isumaqatigiissutaata imarisai paasissutissiissutigisarsimallugit.Pingaarnertut Danmarkip itigartitsissutigisinnaasai ukuupput:

• Ingerlatseqatigiiffiup iluani anguniakkat allannguuteqartinneqassappata,
• malittarisassat allanngortinneqassappata,
• Ingerlatseqatigiiffinnut inatsit naapertorlugu iluarsaaqqinnerit,
• Ingerlatseqatigiiffiup pigisaasa nalillit ilaannik annertuunillu tunisisoqassappat,
• periusissani aningaasaqarnermut tunngasut imaluunniit atugassiinerit, (assersuutigalugu piginneqataassutit agguarneri, aningaasalersuinerit, qularnaveeqqusiinerit aamma pisiortornerit),
• Ingerlatseqatigiiffiup tassanilu aktiaatillit, aammalu pisortaatitat aalajangerneqarnissaat. Suleqataasut akornanni isumaqatigiissuteqarnerni politikkikkut akuliuffigineqannginnissamut tunngavissinneqarput, aamma niuerfinni assigiiaartitsinissamut
• Aktiaatit tunniunneqarnissaannut imaluunniit Ingerlatseqatigiiffimmi aktiaatit qularnaveeqqusiullugit taarsigassarsinissamut akuersissuteqarnerit.

LÆS OGSÅ: Mittarfiit pillugit isumaqatigiissutit inissipput

Ilanngullugu allassimavoq:

- llluatungeriit isumaqatigiissutigaat, Ingerlatseqatigiiffik piginneqatigiissutit naligi aallaavigalugit, aalajangersakkat suliarineqassasut, itigartitsisinnaanerillu taamatuttaaq suliarineqassasut, aamma Ingerlatsiviup aqutsisui politikkikkut akuliuffigineqannginnissamut tunngavissinneqassasut ulluinnarnilu ingerlatsinermut ineriartornissamullu Ingerlatseqatigiiffik kiffaanngissuseqartinneqassasut.

- Taamaammat anguniarneqarpoq, siulersuisut piginnaasunit inuttalersorneqassasut, taamatullu aningasaliisup pingaarnerup siulersuisuni siulittaasoq toqqassagaa.

Pingaartumik aningaasat iluanaarutigineqartussat pillugit illuatungeriit isumaqatigiipput:

• Ingerlatseqatigiiffik iluanaaruteqarfiusutut ingerlanneqassasoq, Kalaallit Nunaannilu angallannerup pitsaanerulernissaa anguniarneqassasoq inuiaqatigiinnut iluaqutaasussanngorlugu.
• Ingerlatseqatigiiffik isumannaatsumik ingerlanneqassasoq, aningaasannanniarfittullu atorneqassanngitsoq isumannaassusaa patajaatsuutikkumallugu.

Kim Kielsen (S) Sermitsiaq.AG-p paasissutissaatai naapertorlugit Københavnimi piginneqatiginninnissaq pillugu sapaatip akunnerata siuliani isumaqatiginninniarpoq.

Inatsisissatut siunnersuut tamakkiisoq suli akuerineqanngikkaluartoq, allannguutissatut siunnersuutip suliap aappassaaneerneqarluni Inatsisartuni oqallisigineqarnerani akuerineqarmat, tamanna piginneqatigiinnermut isumaqatigiinniarnissamut piginnaatitsissutaasoq, Kim Kielsen isumaqarpoq.

- Naalakkersuisut Kalaallit Airports A/S-mi Nuummi aamma Ilulissani nunanit tamalaanit mittarfiit sanaartorneqarnissaannut ingerlanneqarnissaannullu ingerlatseqatigiiffimmi immikkoortortaqarfiusumi aktiaatilittut pisinnaatitaaffiit pillugit danskit naalakkersuisuinut piginnittut isumaqatigiissutaannik isumaqatigiissuteqarnissamut piginnaatinneqarput, allannguutissatut siunnersuummi allassimavoq.

Isumaqatigiissutissatut siunnersuutigineqartup atsiunnginnerani aningaasaqarnermut ataatsimiititaliamut saqqummiunneqaqqaarnissaa Kim Kielsenip (S) siunniuteqqavaa.