Kalaallit Danmarkimi najugallit pillugit paasissutissat nutaat

2020-imi Kalaallit Nunaanni inunngorsimasut Danmarkimilu najugaqalersimasut16.780-iupput, tassa ukiup siulianut sanilliugit 199-inik amerlisimallutik. 2014-imiilli kalaallit Danmarkimi najugaqalersimasut 1.233-nik amerlisimapput. Taamaalilluni 2019-imiit 2020-mut nuussimasut agguaqatigiissillugit amerlassusaat 2014-imili agguaqatigiissillugit nuussimasut amerlassusaannit qaffasinneruvoq.

Kisitsisinit tamarmiusunit takuneqarsinnaavoq, inuit inuusuttunut ilinniarfinni ilinniakkamik imaluunniit ingerlariaqqiffiusumik ilinniakkamik naammassinnissimasut amerlassusaat amerliartortut, meeqqalli atuarfiannik qaffasinnerpaatut ilinniakkamik naammassinnissimasut Danmarkimut nuunnissamik aalajangrsimasut amerlassusaat piffissap ingerlanerani ikiliartorlutik.

Utoqqalinermi soraarnerussutisiallit Danmarkimi amerliartuinnartut

Akissarsiallit namminersortullu amerlanerpaapput, Naatsruseqqissaartarfik ilisimatitsivoq allallunilu:

-Amerlassusaat ikiliartorput, kisianni 2013-imiilli missiliorlugu 39 pct.-imiilluni nikerarsimanngilaq. Imminut pilersorsinnaanissamut ilaquttanillu pilersuisinnaanissamut ikiorsiissutinik pisartut annertussusaat qaffakkiartorpoq, pingaartumik ukiuni 2008-miit 2013-imut. Utoqqalinermilu soraarnerussutisiallit annertussusaat ukiut ingerlanerini qaffariaallattarpoq.

Pingaartumik arnat Danmarkimut nuussnnissamik aalajangertarput. Taamaalilluni kalaallit Danmarkimi najugaqartut 60 procentingajaat arnaallutik.

Inuit pineqartut Danmarkimi najugallit isertitaat atoriaannaasut qiviaraanni, 40 pct.-init annertunerulaartut 100.000-it 200.000-illu akornanni atoriariaannarnik isertitaqarput.

Amerlanerit isertitaqqortuujusut

Takuneqarsinnaavoq 100.000-it ataallugit atoriaannarnik isertitallit amerlassusaat ikiliartortut, 300.000-iniilli annertunerusunik atoriaannarnik isertitallit amerlassusaat qaffakkiartorluni.

Inuit Danmarkimi najugaqalersimasut 16.780-iusut affangajaat ukiut 20-t sinnerlugit Danmarkimi najugaqarsimapput.