Kalaallit ilusilersuisartut illersugaanerulissapput
Kaminnulli kisermaassilluni piginnittussaanissaq ajornakusuussaaq.
Ukiuni makkuni nunatsinni ilusilersuisartut ingerlarsorput, ilusilersugaallu kusanarneqqusaatiinnartut atisanik takutitsinerni takussaasarlutik. Eqalussuup amii, savat meqqui, savap amii soorunami aamma puisit amii qalipaatigissut kamippaliarineqartarput, kjuuliliarineqarlutik kavaajaliarineqarlutillu, taamaattorli suliffissuaqarpoq ilusilersuisartoqarlunilu ilusilersukkanik immikkuullarissuanik assiliillutillu niuernikkut iluaquteqarniartartunik. Taamaattumik kalaallit ilusilersisartut illersorneqarnerusariaqarput.
Inuutissarsiornermut Naalakkersuisoq Ove Karl Berthelsen, Inuit Ataqatigiit, pingasunngormat ualikkut Inatsisartut ataatsimiittarfiani inatsisissanik sisamanik saqqummiivoq, kisermaassilluni piginnittuunissamut, ilisarnaatinut ilusilersukkanullu tunngasunik, taamaalilluni ilusilersukkat nutaalornerillut 'tillinneqarnissamut' illersorneqarlutik.
Ukiut marlussuit matuma siorna qallunaaq ilusilersuisartoq Peter Jensen annertuumik aalassatsitsivoq, kalaallit kamii assilillugit ilusilersuisimanermiinut. Taamatut 'tillinneq' Nuummi akerliussutsimik takutitsinermi kinguneqarpoq, taamaattorli kalaallit atisaasa atoruisalu soorlu annoraaq, qajaq kamillu kisermaassilluni piginnittuuffigineqarsinnaangillat.
Taamaattpq Ove Karl Berthelsen sermitsiaq.ag-mut oqarpoq taamaaliornissamut misiliiniarluni: - Kialuunniit qularutigisinnaanngilaa taakku Kalaallit Nunaannersuunerat, taamaatorli Canadami, Alaskami Siberiamilu naggueqatitsinnut akornusiinaveersaassaasut, taakkumi aamma atortunut atisanullu ineriartortitseqataasimapput. Tamanna immaqa ICC-mi suliassaavoq?
Ivittuut eqqaani Ikkat kangerluarniipput immap naqqani napasuliaasat 1.000-it, sialummit pinngortitat, innermillu anitsisarfiusimasumiit aniallutik kangerlummi immap naqqatigut aniasimasut. Ikkani imeq 10.1-mik seernassuseqarpoq. Tassanilu uumapput bakterissat virusillu, suliffissuarni atorneqarsinnaasut ilaatigut imeq nillertoq atorlugu eqqorissutinut atorneqarsinnaallutik.
Inatsisissatut siunnersuutit aamma pinngortitami nutaalianik illersuinissamik periarfissiipput.