Kalaallit inuusuttut issittumi aqutsisutut ilinniarput
Inuusuttut arfineq-marluk Kalaallit Nunaanneersut qaammatini qulingiluani Issittumi aqutsinermik ilinniarneq naammassivaat.
Inuusuttut taakku qaammatini qulingiluani issittumi aqutsinermik ilinniareerlutik Canadami Yellowknifemi ataatsimeersuarput.
Ilinniartitsineq taanna Arctic Resilient Communities Youth fellowship-imik (ARCYF) taaguuteqarpoq, Canadamilu naalakkersuisunit aningaasalersorneqarpoq. Inuusuttut Issittumiittut, ilaatigut Kalaallit Nunaannit, USA-mit (Alaskamit) Canadamillu, piujuartitsisumik ineriartornermut toqqaannartumik peqataasinnaalernissaat, issittumilu inuiaqatigiinni pigissaarnerulernissamut allannguutinullu piareersimanerulernissamut tapersersuisinnaalernissaat siunertaavoq.
Suliffeqarfik Northern Light, angalanermik pilersaarusiornermut ataqatigiissaarinermullu akisussaasoq, taamatut tusagassiuutinut nalunaaruteqarpoq.
Inuusuttut ilinniarnerminni Issittumi ineriartornissamut periarfissat oqaloqatigiissutigisarpaat, aamma nunani pingasuni taakkunani issittut inuiaqatigiivisa kulturikkut assigiinngissutaat assigiissutaallu eqqartortarpaat.
Illartarlutillu qiasartut
Inuusuttut nunani pingasuni taakkunani kulturit assigiinngitsut pillugit ilinniarput, ministerit aamma NGO-ni suliffeqarfinnilu piujuartitsinermik ineriartortitsinissamik ulluinnarni suliaqartuni siuttut naapillugit.
Iluuna Sørensenip Nuummiup peqataanini ima oqaluttuaraa:
- ARCYF-ip ataatsimoortippaatigut, inuusuttullu Kalaallit Nunaanneersut, Canadameersut Alaskameersullu attaveqarfigilerpavut. Aamma Amerikap avannaani politikki inuussutissarsiornerlu pillugit issittumi ataatsimeersuarnerit annersaanni Arctic Encounter Symposiumimi peqataanissamut periarfissaqarnikuuvugut, Iluuna Sørensen oqarpoq nangillunilu:
- Inuppassuit naapippavut, attaveqaqatigiillualerluta, oqallinnerit tusarnaarlugit ilassinninnernilu amerlavallaartuni peqataalluta. Inuttut ataqatigiillualerpugut. Illartarlutalu qiasarpugut, inuillu allat, nunap inoqqaavi kulturillu allat attaveqarfigilerpavut. Periarfissat assigiissutillu amerlasuut misigaagut, soorlu angerlarsimalluta. Peqataasut tamarmik ataatsimoornerminni sapinngisaminnik iliuuseqartarput, tamannalu takullugu nuannerluinnarpoq.