ilinniartitaaneq
Kalaallit Københavnimi ilinniagaqartut kollegiarsinnaalersut
- Københavnip Universitetiani ilinniagaqartut kollegiarsinnaalernerat nuannaarutigaarput, Københavnimi Kalaallit Illuutaanni pisortaq oqarpoq
Kalaallit Københavnip Universitetiani ilinniagaqartut kollegiassaqarsinnaalerput.
Københavnimi Kalaallit Illuutaat nalunaarpoq.
Namminersorlutik Oqartussat aningaasatigut tapiissuteqareersoq Østerbro Kollegiet Københavnimiittumi ilinniartut qulit najugaqarsinnaalerput.
- Københavnip Universitetiani ilinniagaqartut kollegiarsinnaalernerat nuannaarutigaarput. Københavnimi inissarsinissaq ajornarsinnaasarpoq, ilinniartuullunilu ajornarnerusarluni, Københavnip Kalaallit Illuutaanni pisortaq Leise Johnsen oqarpoq.
Ilinniartut qulit Østerbro Kollegiemi najugaqarsinnaalissapput, aasamilu aamma i kalaallit Københavnimi ilinniarniartut tassani najugaqarsinnaassallutik.
Aqqut siulleq
Odensemi, Aarhusimi Aalborgimilu kalaallit atuartut kollegiassaqartinneqartarput. Danmarkimi ukiumi siullermi atuarnerminni kollegiarsinnaapput, tamanna aamma Københavnimi atuutissaaq.
Kalaallit Illuutaat Namminersorlutik Oqartussallu amerlanerusunik kollegiani inissaqarsinnaalernissaat sulissutigissavaat.
Københavnimi qanoq kollegiassarsisoqarsinnaanersoq sumut.gl-imi juunip aallaqqaataani paasissutissiissummik ikiorsiissummillu saqqummiussisoqassaaq.
Ilinniartunut inissaqartitsinerit
Sermitsiaq.AG-mi marlunngormat allaaserineqarpoq kalaallit Danmarkimi ilinniagaqarniartut inissaqartinneqartalernissaat Siumut, Inuit Ataqatigiit Demokraatillu isumaqatigiissutigigaat. Partii Inuit siunersuummut isumaqataanngilaq, Danmarkimut ilinniariartortarnerup akisuallaarnera pissutigalugu.