Kalaallit naligiissitaanermut politikkiat FN-imi
Kalaallit naligiissitaanermut politikkiat New Yorkimi soraarummeersinneqarpoq.
Juulip 22-ani 2009 Kalaallit Nunaat FN-ip arnanut tunngatillugu komité-ani CEDAW-imi (FN-ip arnanik sutigut tamatigut immikkoortitsinerit atorunnaarsinnissaat pillugu isumaqatigiissut) soraarummeertinneqarpoq, tassani oqaluttuarissallugu Kalaallit Nunaat qanoq ililluni FN-ip arnat pisinnaatitaaffii pillugit isumaqatigiissummik malitsinersoq.
– Soraarummeersitsineq New Yorkimi ingerlanneqarpoq, tassani Kalaallit Nunaat aamma Savalimmiut danskit angalatitaannut ilaallutik. Soraarummeersitsinerup nalaani komitép kalaallit naligiissitaanermut politikkiani assigiinngitsut iserfigaat, taamatut ilisimatitsivoq Isumaginninnermut Naalakkersuisoqarfik.
Kalaallit Nunaanut tunngatillugu FN-ip komitéanit pingaartumik sammineqartoq tassaavoq isumaqatigiissummi aalajangersakkanik timitalersuineq naalagaaffeqatigiinnermilu kalaallit pisinnaatitaaffii. Ilanngullugu apeqqutigineqarpoq Kalaallit Nunaanni naligiissitaaneq pillugu suliniarnerup ineriartortinneqarnera, ngo-nik suleqateqarneq, arnanik persutaasarneq, ilinniartitaanermi pisinnaatitaaffiit.
– Soraarummeersitsinermi erseqqissarneqarpoq naligiissitaanermut tunngasutigut Kalaallit Nunaat pitsaasunik arlalitsigut angusaqarsimasoq, Naalakkersuisullu maligassiuillutik siuuttuusut. Tamatumunnga ilutigitillugu ajugaaffiginiagassanik unamminiagassaqarnera nassuerutigineqarpoq. Assersuutigalugu arnanik persuttaasarnermut tunngasut, isumaginninnikkullu aaqqissuussanik ineriartortitsinerit, pinaveersaartitsinermut ikiorsiisarnermullu tunngasut ineriartortinneqarnissaat, Isumaginninnermut Naalakkersuisoqarfik allappoq.
Komitép inerniliinera innersuussutinittaaq imalik siusinnerpaamik augustimi nassiunneqassangatinneqarput Naalakkersuisunullu saqqummiunneqarlutik.